Апта дүйсенбісінде қаламыздағы іргелі кәсіпорындардың бірі «Құрама темір-бетон ӨБ» ЖШС-де Қазақстанның еңбек сіңірген құрылысшысы, «Алтын жұлдыз» орденінің иегері, Халық қаһарманы, аталмыш кәсіпорынды ұзақ жылдар бойы басқарған Аким Атмачиди атындағы дәрісхананың ашылу салтанаты болып өтті.
Аталмыш шараға қала әкім Ермак Сәлімов бастаған әкімдік өкілдері, Аким Ивановичтің әр жылдардағы өнегесін көрген шәкірттері, әріптестері мен жолдастары жиналды. Алдымен дәрісхананың ашылу рәсімі өтіп, лента қию рәсімі жасалды. Осыдан соң құрметті қонақтар дәрісханаға қойылған жәдігерлермен танысты.
{jcomments on}Кабинетте Аким Ивановичтің өмірі жайлы мол мағлұмат беретін көрнекіліктер қойылған. Әсіресе, семейлік ерен еңбек адамының әр жылдарда Елбасы Н.Назарбаевтың қолынан түрлі марапаттар алған сәті көрініс тапқан фотосуреттер қойылыпты. Сонымен қатар ол басқарған еңбек ұжымының жеңіп алған еңбек қызыл туы да төрден орын алған.
— Бүгін тағдыры аңызға айналған, Семей өңірі үшін, байтақ еліміз үшін елеулі еңбек сіңірген Аким Атмачидидің туған күні қарсаңында оның атына дәрісхана ашылып жатыр. Білетініміздей Аким Ивановичтің ізбасар шәкірттері көп. Ол сондай-ақ кейінгі буын үшін еңбек адамының үлгісі болып саналады. Ерен еңбегі мен көреген басшылығының арқасында артына жарқын естеліктер қалдырған тұлға бейнесі жерлестерінің жадында ұмытылмасы анық. Бұл кабинеттен Аким Атмачидидің адами болмысын, еңбектегі жетістіктерін ғана емес, өзі өркендеуіне үлес қосқан Семей өңірінің өндіріс саласындағы өткен тарихын да көргендей болдым, — деді өз сөзінде қала әкімі Ермак Бидахметұлы.
Сонымен қатар Е.Сәлімов дәрісханаға әкелген арнайы сыйлығын да тарту етті.
Дәрісханаға қойылған жәдігерлерді комбинатта қызмет еткен А. Атмачидидің әріптестері жинастырыпты. Алдағы уақытта оның есімімен байланысты деректер мен фотосуреттер, бұйымдар әлі де жинастырыла бермек. Бұл жайында түсінік беріп өткен іргелі кәсіпорын басшысы Баласұлтан Абдуллаев өзі ұстаз тұтатын адамның өмір жолдарына, көрсеткен қамқорлықтары жайында да кеңінен тоқталды.
Өндіріс саласындағы алғашқы еңбек жолын дәл осы темір-бетон құрастыру комбинатында техник-лаборант ретінде бастап, түрлі өндірістік қызметтерді атқарған Аким Атмачиди 1966 жылдан бастап осы кәсіпорынның бас директоры болған еді. Осы кезеңде ол басқарған кәсіпорын құрамында әр түрлі үлгідегі темір-бетон конструкциялары мен бұйымдарын өндіретін 3 комбинаты, 3 зауыты бар ірі бірлестікке айналды. Ол басшылық еткен уақыттың ішінде бірлестік өнім шығару көлемін 21 есе ұлғайтып, республикадағы ең негізгі базалық салаға айналды. Кәсіпорынның ішкі технологиясы жетілдіріліп, өндірістік процестер толықтай автоматтандырылды. Тағы бір маңызды жайт, Аким Иванович өндірісте шыңдалған көптеген шәкірттер тәрбиелеп шығарды.
Осы жайында пікір өрбіткен кәсіпорын басшысының орынбасары Бекболат Мусин Халық қаһарманының адами қасиеттері жайында да айтып өтті.
Халық қаһарманы атанған тұлғаның есімі жерлестерінің жадында ұзақ сақталатыны анық.
Қуаныш ЖОЛЫМБЕТ, «Семей таңы»
