Асыл дініміздегі маңызды мереке саналатын Құрбан айттың алғашқы күні семейлік жамағат қаладағы барлық мешіттерге көп жиналды.Әнет баба атындағы Қос мұнаралы орталық мешітте шаһар басшысы Ермак Сәлімов пен қалалық мәслихат хатшысы Бейсенбек Ақжалов та болған еді.
Алдымен Құрбан айттың хұтбасы оқылып, соңынан жұртшылық айт намазын өтеді. Мүбарак мерекедегі мінәжатта ҚМДБ-ның Семей аймағы бойынша өкіл имамы Мақсат қажы Алтыбай осынау мерекелі күндердің қадір-қа-сиеті жайында насихат айтты. Мерекелік уағызы барысында өкіл имам Зулхижжа айының мәртебесі, құрбандық шалудың маңызы және қажылық ғибадаты төңірегінде де сөз өрбітті.
{jcomments on}Бұл күні орталық мешітке көпшілікті Құрбан айт мерекесімен құттықтау мақсатында қала әкімі Ермак Сәлімов пен қалалық мәслихат хатшысы Бейсенбек Ақжалов та келді. Өкіл имам Мақсат қажы Алтыбай хұтба оқып болғаннан кейін, қала басшысы сөз алып, жиналған жамағатты діні-міздегі осынау мерекемен құттықтады.
— Сіздерді барша мұсылман қауымының қасиеттi мейрамы Құрбан айтпен шын жүректен құттықтаймын! Құрбан айт — жалпы адамзатты жақсылық пен ізгілікке, бауырмалдық пен имандылыққа жетелейтін ұлық мереке. Бұл күндері әрбір мұсылман Жаратушыдан ізгі тілектер тілеп, ел тыныштығы мен халық бірлігін, отбасының амандығын тілейді. Егемен елімізде әрдайым тыныштық, береке болсын, — деді Ермак Бидахметұлы өз сөзінде.
Осыдан кейін екі рәкағат айт намазы оқылып, жамағат дұға етіп, тілек тіледі.
Ал айт намазынан кейін қала әкімі Ермак Бидахметұлы Алла разылығы үшін құрбандық мал шалды.
Айт күндері қаламыздағы барлық мешіттерде шалынған құрбандық еті жағдайы төмен, көпбалалы отбасылар мен қарттар үйіне, балалар үйлеріне таратылып берілетін болады.
Осылайша, қалалықтар мерекелеуді бастап кетті. Үш күнге жалғасатын Құрбан айт мерекесінде Орталық мешіт қызметкерлері қала тұрғындары үшін ұлттық спорт түрлерінен сайыстар ұйымдастырып, атаулы күнді айрықша көңіл- күймен өткізуді жоспарлауда. Бүгін жұма намазынан кейін мешіт ауласында арқан тартыс, қой көтеру, қол күресі, қазақша күрес сынды ойын-сауықтық шаралар ұйымдастырылып, айт мейрамы бабалар дәстүріне сай думанға айналдырылмақ.
Асан МЫРЗАХАНОВ, «Семей таңы»
