Қазан айының 1-і — Халықаралық қарттар күніне орай «ҚТЖ» ҰК» АҚ Семей жол бөлімшесі филиалында ардагерлер құрметіне арналған салтанатты шара өтті. Аға буын өкілдеріне арналып ақ дастарқан жайылып, тілектер тиегі ағытылды. Ұзақ жылдар бойы темір жол бойында тер төккен қариялар өткен күндер жайлы естеліктерінен сыр шертіп, ашық-жарқын райда әңгіме өрбітті.
{jcomments on}Көпшілік алдында құттықтау сөз алған бөлімше басшысы Марлен Көкірекбаев қазыналы қарияларды осынау күнмен құттықтап өтіп, олардың күні кеше еліміздегі бірден- бір өзекті сала темір жол қызметін өркендетуге қосқан ерен еңбектерін атап өтті. Сондай-ақ олардың тәжірибелері мен көрген — түйгендері бүгінгі сала мамандары үшін үлкен өнеге көзі екенін жеткізді.
Өз кезегінде «Қазақстан темір жолы» ҰК» АҚ президенті жанындағы консультативтік кеңес мүшесі, Семей жол бөлімшесі бойынша ардагерлер кеңесінің төрағасы Қырықбай Әлсейітов, «Қазақстан Республикасының теміржолшылар кәсіподағы» қоғамдық бірлестігінің Семей өңірі бойынша өкілі Алик Тұрсыновтар да сөз алып ізгі лебіз білдірді.
Бүгінде Семей жол бөлімшесі бойынша 2000-нан аса ардагер бар екен. Оның ішінде 21 адам — сұрапыл соғысты көргендер. Қарт теміржолшылардың арасында қоғамдық өмірде белсенділік танытып жүргендері де бар. Темір жол мекемелерінде сала ардагерлерін үнемі назардан тыс қалдырмайды, тіпті тораптық жиындарға да шақырылады. Бұл жайында сөз еткен Қырықбай Әлсейітұлы мерекелік жиынға қатысып отырған барша қарияны кейінгі буынға өнеге көрсетуге, қызметтік салада ақылшы-кеңесші болуға шақырды.
Өз кезектерінде темір жол саласының ардагерлері де ерекше назарға алып, осындай іргелі шараға бастамашы болғаны үшін, Семей жол бөлімшесінің басшысы Марлен Кәрімұлына алғыстарын білдіріп, баталы тілектерін жолдады.
Қ. ӘЛІМБЕК,
«Семей таңы»
