1 қазан – Халықаралық қарттар күні қарсаңында қаланың орталық кітапханасында қариялар арасында шахматтан қалалық сайыс өтті. Көнекөздер арасындағы тақталы ойынды «Семей — менің үйім» қоғамдық ұйымы мен қалалық дене шынықтыру және спорт бөлімі ұйымдастырды.
{jcomments on}Турнирдің ашылу салтанатында Семей қаласы дене шынықтыру және спорт бөлімнің басшысы Мұрат Құржықаев қарияларды мерекелерімен құттықтады. Сайысқа отызға жуық қария қатысуға ниет білдірген екен. Олардың арасында өз заманында ел игілігі жолында әртүрлі салада еңбек еткендер бар. «Семей — менің үйім» қоғамдық ұйымының жетекшісі Дәулетиә Бұқаевтың айтуынша, бұл шараны ұйымдастырудағы мақсат қаладағы қариялардың рухани әрі денсаулықтарына пайдалы тұрғыда тынығуға жағдай жасау болып табылады. Айта кету керек, жарысқа қатысқандар арасында шахматтан спорт шеберлігіне үміткер зейнеткерлерде бар екен.
— Алтыншы жыл қатарынан осы турнирді өткізіп отырмыз. Көптен бері жүздеспеген замандастардың бір-бірімен көрісуіне мүмкіндік жасағымыз келді. Мұндай сәттерде қариялар пікір алмасып, ой бөлісіп, серпіліп қалады. Біздің ақсақалдарымыздың ортасында шахматтан едәуір жетістікке жеткендері де бар. Мәселен, Михайл Лукин есімді қария — талай сайыстарда олжа салып үлгерген шахматшылардың бірі. Одан өзге де тәжірибесі мол, жүлдеге ілініп жүрген қариялар бар, — дейді Дәулетиә Әсперұлы.
Турнирдің нәтижесі бойынша, жүлдегерлер арнайы сыйлықтармен, мақтау қағаздарымен марапатталады.
Жақсылық МҰРАТҚАЛИ,
«Семей таңы»