Семей қаласының әкімі Ермак Сәлімов пен қалалық мәслихат хатшысы Бейсенбек Ақжалов, 1 қазан — Халықаралық қарттар күні мерекесіне орай, шаһардағы зейнеткерлерге әлеуметтік қызмет көрсету аумақтық орталығында болды.
{jcomments on}Қазыналы қарттарымызбен кездесуде орталық директоры Галина Дуксум-баева қала басшысына мекеменің қызметін жан-жақты таныстырып, орталықтың тыныс-тіршілігінен хабардар етті. Ардагерлердің арасында «Мейірім үйі» деген атқа ие болған орталық бүгінде қала бойынша бір мыңнан астам ардагерге әртүрлі қызмет көрсетеді. Айталық, денсаулықтары келгендері орталықтың күндізгі бөліміне келсе, жүруі қиындаған қарттарға әлеуметтік қызметкерлер өздері барады екен. Жалпы, аумақтық орталықта барлық талаптарға сай асхана, фитобар, психологиялық және медициналық көмек сынды қызметтер көрсетіледі.
Шаһар басшысы Ермак Бидахметұлы ең алдымен мекеменің ауласына Жеңістің 70 жылдығы қарсаңында демеушілердің көмегімен салынған стеллаға гүл шоқтарын қойды. Кейін ауладағы ардагерлердің «Денсаулық жолы» жаяу жүргіншілер жолағымен танысты. Орталық директоры Галина Дуксумбаеваның айтуынша, бұл жолда ардагерлер күнделікті жаттығу жасап, медициналық тексеруден өткізіледі.
Қала әкімі ардагерлердің өз қолдарынан шыққан әртүрлі қолөнер бұйымдарымен де таныс болды. Бұл жұмыстарды ерекше бағалаған әкім орталықтағы еңбек терапия бөлмесі мен психологиялық көмек көрсетуге арналған бөлмелермен танысты. Кейін орталықтың үлкен залында ардагерлермен кездесіп, оларды мерекелерімен құттықтады.
— Әлем халықтары бүгінде осы атаулы мерекені атап өтіп жатыр. Еліміз де солардың қатарында. Жалпы, мемлекетіміздің қарияларға деген қамқорлығы толастаған емес. Бүгінде заманында тынбай еңбек еткендері үшін қарияларға барынша жағдай жасалып отыр. Жастарымыз сіздерден үлгі алады, — деген Ермак Бидахметұлы бірлік пен татулық, тұрақтылық пен рухани келісім бар жерде, береке де бар екенін атап өтті.
Шара соңы Семей қаласының зейнеткерлерге әлеуметтік қызмет көрсету аумақтық орталығының күндізгі бөлімінде демалушы ардагерлерге арналып аумақтық орталықтың әлеуметтік қызметкерлері қатарынан құрылған «Иртышаночка» вокалдық тобының қатысуымен концерттік бағдарлама ұсынылды. Кеш барысында туған қаламыз Семейге арналған әндер мен басқа да авторлық әндер орындалды.
Асан МЫРЗАХАНОВ,
«Семей таңы»