Жуырда қаламыздағы Ф. Достоевский атындағы әдеби-мемориалдық мұражайында еңбек күніне арналған елеулі шара болып өтті. Бас ғимараттың жанында «Еңбек адамы» атты ерекше жәрмеңке ұйымдастырылды. Мұндағы көзделген мақсат сол – өңіріміздегі еңбек адамдарының жетіс-тіктерін жалпақ жұртқа паш ету, молшылық пен тоқшылықтың мерекесіндей саналатын алтын күздің мол тартуынан көрме әзірлеу болатын.
{jcomments on}Аталмыш шараға қаламыздағы азық-түлік өнімдерін өндіретін ірілі-кішілі кәсіпорындар қатысты. Өнімдерін сөреге жайып салып, жәрмеңкеге келушілер алдында сауданы қыздырған серіктестіктер арасында нан-тоқаш және макарон сынды тағам түрлерін шығаратын «Семнан» ЖШС, «Фастфуд Арай» ЖШС сынды ірі фирмалар өкілдері болды. Белгілі жайт — еңбек адамының алтын қолынан шыққан бұл азық-түліктер еліміз бойынша бірінші кезекте тұтынылатын өнімдер саналады. Әсіресе, «Семнан» ЖШС әкелген жаңа піскен нан түрлері келушілер назарын еріксіз аударды. Онда тәбет ашар украин бөлкесі, орыс каравайы, бал жағылған татар тоқашы және түрлі пішінде пісірілген тәтті салмалар қосылған печеньелер болды.
— Бүгінгі жәрмеңкеге қолданбалы өнер түрлерімен айналысатын қолөнер шеберлері де келді. Олар өз қолдарымен әзірлеп әкелген түрлі әсем әшекейлерін саудаға шығаруда. Әйтсе де, келуші көпшілік, негізінен, азық-түлік өнімдерін көптеп сатып алуда. Аталмыш шараны өткізудегі мақсатымыз еңбек адамының жетістіктерін көрсету, жастарды еңбекке баулу, биылғы жаздағы еңбек маусымын қорытындылап, шаруалар жетістіктерін паш ету болатын, — дейді жәрмеңкені ұйымдастырушылардың бірі, аталмыш мұражайдың ғылыми-ағарту бөлімінің меңгерушісі міндетін атқарушы Салтанат Секенбаева.
Айта кету керек, «Еңбек адамы» жәрмеңкесі қаламызда тұңғыш рет өткізіліп отыр. Оған әсіресе жастар қауымы тартылыпты. Мәселен, қаламыздағы іргелі оқу орны Қаз ИГЗУ студент- тері шағын концерттік бағдарлама ұйымдастырып, келушілерге ән мен жырдан тарту жасады. Ал егде буын тұрғындар кәсіпорын бағасымен саудаға шығарылған балғын өнімдерді молынан сатып алып жатты.
Қуаныш ЖОЛЫМБЕТ,
«Семей таңы»