Семей қаласы әкімдігінде алты баласы бар жеті анаға «Күміс алқа» тапсырылды. Салтанатты жиында көпбалалы аналарды Семей қаласы әкімінің орынбасары Надежда Шарова құттықтады.
{jcomments on}Әйел өмірде ең маңызды саналатын бала тәрбиесімен айналысады. Сондықтан да аналар ерекше назар аударып, құрмет көрсетуге лайықты. Отбасын берік ұстап отыру — қазіргі қоғамдағы ең маңызды мәселелердің бірі. Өйткені отбасы- мемлекеттің негізі. Бүгінде елімізде көпбалалы отбасылар артып келеді. Ал мемлекет тарапынан оларға әрдайым көмек көрсетілуде.
— Құрметті аналар! Сіздерді қала әкімі Ермак Сәлімовтің атынан «Күміс алқа» алуларыңызбен шын жүректен құттықтауға рұқсат етіңіздер. Дендеріңіз сау, отбасыларыңыздан тәуелсіз Қазақстанымыздың болашағы — балаларымыздың күлкісі кетпесін, — деді қала әкімінің орынбасары Надежда Шарова.
«Күміс алқа» иегерлерінің арасында Алтын Молжігітова да бар. Алты құрсақ көтерген көпбалалы ананың кенжесі 1 жастан енді асса, үлкені 23-те екен. «Басты байлығым — балаларым» деген Алтын апай өзін бақытты аналардың қатарындамын деп есептейді.
— Мен өзімді бақытты ана санаймын. Өйткені бар бақытым, байлығым — осы балаларым. Қазіргі жастарға қорықпай өмірге сәби әкеле беріңіздер деп айтқым келеді. Ал мемлекет тарапынан көпбалалы аналарға қолдау көрсетіліп жатқаны- құптарлық іс, — дейді Алтын Молжігітова.
Аналарды марапаттау рәсімінен кейін Семей қалалық жұмыспен қамту және әлеуметтік бағдарламалар бөлімі басшысының орынбасары Азамат Құрманғалиев сөз алып, көпбалалы аналарға жүрекжарды лебізін білдірді. Сондай-ақ ол аналарға мемлекеттік жәрдемақыны алу жолын түсіндіріп берді.
Заңға сәйкес, 7 және одан көп баласы бар аналар «Алтын алқа», 6 баласы бар аналар «Күміс алқа» төсбелгісіне ие болады. Енді «Күміс алқа» иегерлері ай сайын 12 685 теңге мемлекеттік жәрдемақы алады. Айта кетерлігі, бұдан бөлек елімізде 4 немесе 5 баласы бар аналарға 8 246 теңге мөлшерінде жәрдемақы төленеді.
А.САМАТҰЛЫ,
«Семей таңы»