Семей қаласында көшелерді қысқы мезгілде қадағалау «Семей» көгалдандыру және абаттандыру коммуналдық кәсіпорнына жүктелген. Сондай-ақ, бұл мекемемен бірге өзге де мекемелер қосалқы жұмыстар жүргізеді. Атап айтсақ, «Гордорстрой» ЖШС, «Озон-93» және «Баймағамбет» ЖШС- де осы тараптағы жұмыстарға қатысады. Ал шаһар көркі саналатын аспалы көпір және оған бастап апаратын жолдар жергілікті «Көпірбасқармасы» мемлекеттік мекемесінің құзырына кіреді.
Бүгінде баса назарға алынған қала көшелерінің жалпы ұзындығы 240, 031 шақырымды құрайды. Күн сайын бұл көшелер мен саябақтардағы тазалық шараларын жүргізуге 50 арнайы техника бірлігі мен 150 жұмысшы жұмылдырылуда.
Ал қар түскен кезде арнайы қар тазалағыш техника тартылады. Сондай-ақ, қар тиегіштер мен құм шашатын техникалар да шаһар көшелеріне шығады.
Сонымен қатар, көшелердегі қауіпсіздік шараларын жүзеге асыру мақсатында таңертеңгі уақытта жүргіншілер үшін қауіпті деп санал-ған аумақтарда инертті материалдар шашылады. Мұндай орындар қатарына автобус аялдамалары, жер асты өткелдерінің баспалдақтары, көше қиылыстары, жаяу жүргіншілер жолы мен тротуарлар жатады.
Сондай-ақ, қаладағы қозғалыс жиі аумақтардағы, аялдамалар мен көше қиылыстарындағы қардың шығарылуы тұрақты түрде жүргізіліп келеді. 15 қаңтар күнгі мәлімет бойынша қыс басталғалы бері қала көшелерінен 13 мың шаршы метр жердің қары шығарылған.
Бұл бағыттағы жұмыстар ұдайы қадағалауда болмақ.
Қалалық ТҮКШ бөлімінің абаттандыру секторы
