Семей қалалық әкімдігінде ведомствоаралық комиссияның құқық бұзушылықтың алдын алу бағытындағы шараларды талқылауға арналған кезекті отырысы болып өтті. Комиссияның кезекті отырысына қала әкімі Ермак Сәлімов қатысты.
{jcomments on}Тоқтала кетсек, аталмыш комиссия 2010 жылдың 29 сәуірінде ҚР Заңнамасының № 271-ІV «Құқық бұзушылық профилактикасы» Заңына сәйкес құрылған болатын. Бұл жолғы комиссия отырысында мемлекеттік мекемелер мен құқық қорғау органдары басшылары, жалпы алғанда, ведомствоаралық комиссия өкілдері толық қатысты.
Күн тақырыбында өзекті деп саналған бірқатар мәселелер қаралып, талқылауға түсті. Атап айтсақ, жол қозғалысы қауіпсіздігін сақтау мақсатындағы қабылданған шаралар жайында Семей қалалық ІІБ басшысының орынбасары Мақсат Зекенов арнайы баяндама жасады. Мақсат Амантайұлының айтуынша, бүгінгі таңда аталмыш бағыт бойынша өзекті мәселе туындап отырған жоқ. Сол себепті де жалпы қалалықтар ұсынысы және осыған дейінгі қаралған бірқатар мәселелер бойынша тұшымды жұмыстар жүргізіліпті. Қазіргі ахуал қалыпты.
Сонымен қатар шаһарымыздың санитарлық-эпидемиологиялық ахуалын қамтамасыз ету жұмыстары жайында Семей қалалық тұтынушылардың құқықтарын қорғау басқармасының басшысы Бағлан Шегедеков кең көлемде баяндап өтті. Қазіргі күндері қаламыздағы бұл бағытта жүргізіліп жатқан шараларды қала әкімі Ермак Бидахметұлының өзі тікелей қадағалауына алған болатын. Жергілікті атқарушы биліктің шаһардың санитарлық-тазалық мәселесіне оң көңіл аударуы аталмыш жұмыстардың нәтижелі болуына түрткі болыпты.
Қорыта айтқанда, күн тәртібінде қаралған қос тақырып бойынша құқық бұзушылық іс-әрекеттер мен өрескел қателіктерге жол берілмеген.
«СТ — ақпарат»
