Семей қаласына соңғы жасаған жұмыс сапарында ШҚО әкімі Даниал Ахметов жылу құбырларын жаңалап жатқан мердігер мекеме мен жылу қазандықтары басшыларына қазан айының 7-ші жұлдызына дейін атқарылып жатқан шаруаны тиянақтауды тапсырып, кез келген сәтте, тіпті түн ортасында келіп тексеруі мүмкін екенін айтып өткен болатын. Осы ретте қала әкімі Ермак Сәлімов қалалық ТҮКШ, жолаушылар көлігі және автомобиль жолдары бөлімінің басшысы Александр Генрих пен «Теплокоммунэнерго» МКК-нің техникалық директоры Николай Ушаков сынды бірқатар жауапты мамандармен бірге сәрсенбі күні түнгі сағат 12.00-де шаһардағы жөндеу жұмыстары жүргізіліп жатқан бірқатар жылу нысандарын аралады.
{jcomments on}Рейд барысында қала әкімі бастаған топ ең алдымен қаланың сол жағалауындағы, жылу желілеріне күрделі жөндеу жұмыстары жүргізіліп жатқан 410-шы кварталға келді. Мұндағы қарқынды жұмыс барысымен танысқан соң жұмыс тобы 506-шы кварталдағы жылу трассасына барды. Түн жарымда да дамылсыз жүргізіліп жатқан жұмыс барысын бақылаған Ермак Бидахметұлы жауапты мамандармен тілдесті. Олардың айтуынша, бұл жердегі ауыстырылып жатқан құбырлардың ұзындығы 700 метрді құрайды екен.
Одан кейін Ермак Сәлімов бастаған топ 35-ші квартал және “Зооветинститут” қазандықтарында болды. Екі қазандыққа да қайта жаңғырту жұмыстары жүргізілуде. Қазандықтардың жұмысымен танысқан қала басшысы ондағы жұмысшылардан атқарылып жатқан жұмыстың жайын білді.
— Реконструкция жүргізіліп жатқан “Зооветинститут” қазандығының жұмысы 1 қыркүйек күні басталған болатын. Жоспар бойынша 15 қазан күні аяқтауды көздеп отырмыз, — дейді жауапты мамандардың бірі.
Аталмыш қазандықтың психоневрологиялық диспансері мен қарттар үйі сияқты мекемелерді жылумен қамтамасыз ететінін тілге тиек еткен «Теплокоммунэнерго» МКК-нің техникалық директоры Николай Ушаков қала әкіміне ауруханалар мен оңалту орталықтары сияқты әлеуметтік нысандарға 2 қазан күні тәуліктің екінші жартысында жылу берілетінін, көмір қорының жеткілікті екенін, күн сайын тасымалданатынын баяндап өтті.
Қазандықтардың жұмысымен танысып шыққан соң Дорожник кентіндегі жылу трассасында болып, ондағы жұмыс барысын бақылаған шаһар басшысы журналистер тобына сұхбат берді.
— Облыс әкімі Даниал Кенжетайұлының тапсырмасына сәйкес, «Нұрлы жол» бағдарламасы аясында тозығы жеткен жылу құбырларын ауыстыру жобалары бойынша күрделі жөндеу жүргізіліп жатқан нысандарды араладық. Нысандардағы жұмыс кестеге және жоспарға сай қарқынды түрде жүргізілуде. Облыс басшылығының тапсырмасына сәйкес, 2 қазан күні ыстық су, ал 7 қазан күні жылу берілуі тиіс. Кейбір нысандардың жұмысы аяқталуға жақын екенін көзімізбен көрдік. Жылу мәселесі бойынша семейліктерге алаңдауға еш негіз жоқ. Ал жылуға қарыз мәселесін айтар болсақ, соңғы екі айдан бері бұл тұрғыда қарқынды жұмыс жүргізілуде. Қала жылу маусымына тиісті деңгейде өту үшін барлық жағдайлар жасалуда, — деген Ермак Бидахметұлы сұхбат барысында қала тұрғындарын үйлерін қысқа бір адамдай дайындауға шақырды.
Нұрдәулет КӘКІШЕВ,
«Семей таңы»