Елбасының Қазақстанның болашағына бағытталған саясатының арқасында білім саласы жылдан—жылға жақсы нәтижелерге қол жеткізуде. Талап біреу — қазіргі заманғы бәсекеге қабілетті білімді ұрпақ қалыптастыру. Бүгінгі өзгермелі өмірді еркін бағдарлай алатын, өзін—өзі дамытып, өз бетінше дұрыс, жауапты шешім қабылдай білетін тұлғаны тәрбиелеу – қоғамдық мәні үлкен мәселе. Мектепте алған білімі мен біліктілігі негізінде жаңа ғасырда қоғам мен мемлекет дамуына ықпал ете алатын азамат тәрбиелеу басты мақсат болып отыр. Тәуелсіз еліміздің өсіп—өркендеуі мен халқымыздың рухани тұрғыдан өсуіне, адами қасиеттердің жоғарылауына, жеке адамның сапалық ерекшелігінің өрлеуіне білімнің ғана құдіреті жететіні күннен—күнге айқындалып келеді. Әрбір елдің өркендеуі де тұғырының берік болуы да білімге келіп тіреледі. Бұл орайда мектептердің талапқа сай болуы, білім беру жүйесіне жағдай жасау — күн тәртібінен түспей келе жатқан мәселе.
{jcomments on}Үржар ауданына Серік Зайнулдин басшылыққа келген соңғы екі жылдан артық уақытта білім беру мекемелерінің талапқа сай болуына ерекше көңіл бөліне бастағаны көпшілік назарынан тыс қалып отырған жоқ. Соңғы жылдары бірнеше жаңа мектеп ғимараттарының пайдалануға берілуі аудан басшысының білімді ұрпақ тәрбиелеуге жасап отырған қамқорлығының айғағы болса керек. Таяуда тағы бір мектеп жас ұрпаққа есігін ашып, Барқытбел ауылында өткен жылы құрылысы басталған 130 оқушыға арналған жаңа мектеп ғимараты пайдалануға берілді.
Білім ордасының ашылуына арналған салтанатты жиынға Үржар ауданының әкімі Серік Зайнулдин, аудандық ішкі саясат бөлімінің басшысы Біржан Тұрлыбеков, білім, дене шынықтыру және спорт бөлімінің басшысы Сәуле Жүнісова, ардагерлер кеңесінің төрағасы Нұрланбек Сандыбаев, мәслихат депутаттары мен БАҚ өкілдері қатысты.
Көпшілік алдында алғашқы болып сөз алған аудан әкімі Серік Зайнулдин осынау қуанышқа жиналған халықты құттықтап өтті.
— Ауданымызда құрылысы басталған 21 мектептің 15-шісі сіздердің мектептеріңіз еді. Міне, белгіленген мерзімінде аяқталып, игіліктеріңізге беріліп отыр. Сол себепті де құрылысшыларымыз, мердігер компания — «Рулан Сервис» серіктестігіне рақметімді айтамын. Сонымен қатар аудандағы бөлім басшыларына, ауыл әкіміне, ата-аналарға, мектептің басшыларына, мұғалімдер ұжымына алғыс білдіргім келеді. Жаңа да заманауи білім ордасының ішінде оқушыларымыз тек қана бестік бағамен оқуы тиісті. Ал осы мектептің салынуына, жолдарыңыздың жөнделуіне атсалысып жүрген жерлестеріңіз, аудандық мәслихаттың депутаты Б. Мұсабаевқа рақметімді айтамын, — деген аудан әкімі жаңа мектепке музыкалық құрылғы сыйлап, еселі еңбектері үшін құрылыс жұмыстарына басшылық еткен Рауан Рысалдыұлына, Дархан Сержанұлы мен Сырым Ғалымұлына алғыс хаттар тапсырды.
Аудандық мәслихат депутаты Бақтыбек Тоқашұлы:
— Құрметті жерлестер! Бүгін Барқытбел ауылында ақ түйенің қарны жарылған күн деуге болады. Қазіргі жаһандық дағдарыс салдарына қарамай, ауылымызда жаңа мектеп ашылып жатыр. Бұл мектептен еліміздің ертеңі үшін аянбай қызмет етер мықты азаматтар шығады деген үміттеміз. «Жұмыс істейтін адам қисын іздейді, істемейтін адам сылтау іздейді» демекші, баршаңызды бір жағадан бас, бір жеңнен қол шығарып еліміздің өркендеуіне үлес қосуға шақырамын, — деп мектепке түрлі түсті теледидар сыйға тартты.
Осындай құттықтаулардан кейін мектептің кілтін жаңа заман талабына сай көрікті ғимаратты салған мердігер компанияның жетекшісі Р.Бабаев мектеп директоры М. Жыңғылбаевқа табыс етіп, өзінің жүрекжарды жылы лебізін білдірді.
Сонымен қатар жүрек толқытар ерекше сәт орын алып, ақ жаулықты әжелеріміз шашу шашып, Үржар ауданының Құрметті азаматы, Құрмет орденінің иегері, аудандық ардагерлер кеңесінің төрағасы Н.Сандыбаев, Барқытбел мектебінде қызмет еткен қарт ұстаз Т.Цыпенко, ауылдың ардақты ақсақалы, тыл ардагері О.Гасекелдиновтар жаңа білім ордасының лентасын қиды.
Осылайша, шара соңында жиылған көпшілік «жаңа мектептің босағасы құтты болсын, ұстаздарға табыс тілейміз, бұл мектептің түлектері әрдайым биіктерден көріне берсін, халқының атын шығарар шәкірттер көп болғай» деген ақ тілектерін жаудырып жатты.
Сонымен, Елбасымыздың: «Біздің жастарымыз оқуға, жаңа білім мен ғылымды игеруге, жаңа машықтар алуға, білім мен технологияны күнделікті өмірде шебер де тиімді пайдалануға тиіс. Біз бұл үшін барлық мүмкіндікті жасап, ең қолайлы жағдайлармен қамтамасыз етуіміз керек»,- дегені белгілі. Бүгінгі Барқытбелдегі білім ордасы аудан басшылығының Президентіміздің тапсырмасын орындау жолындағы игілікті істерінің бірі болды деп айтуымызға болады.
Бауыржан ЖАҚЫП,
«Семей таңы»
