Өткен жылдың соңғы айларында орын алған қала өмірі үшін жағымды жаңалықтардың бірі – жолаушы тасымалы және көлік қатынасындағы өзгерістер болып отыр. Ұзақ жылдан бері қала көшелеріндегі жолаушылар көлігінің қозғалысы еш өзгеріссіз келген еді. Шаһар халқының саны жылдан жылға артып, көшелердегі көлік қозғалысы да күрделенген сайын бірқатар мәселелер туындаған болатын. Бұл орайда жергілікті атқарушы биліктің жолаушылар көлігіне байланысты енгізген өзгерістері қала жұртшылығының көңілінен шықты.
Көпшіліктің көңілін күпті еткен бұл мәселенің шешімі өткен жылдың тамыз айында оңынан шешілді. 2013 жылдың тамыз айының 1-і күні жүргізілген конкурс нәтижелері бойынша қала ішіндегі жаңа бағыттар белгіленді. Нәтижесінде, шаһар ішінде жолаушы тасып жүйткитін 57 қоғамдық көліктің бағыты белгіленді. Оның 40-ы автобус, ал қалған 17-і шағынавтобустар болатын.
Жалпы қала ішінде күнделікті 483 көлік бірлігі (резервтегілерді қоса алғанда) жолаушы тасымалдаумен айналысады. Оның 30-ы өте жоғары кластағы автобустар болса, 72 бірлігі үлкен кластағы, 24-і орташа, 192-і кіші және 165-і өте шағын класқа жатады.
Қалаішілік көлік қозғалысының ұзындығы 12,5 шақырымнан 48 шақырымға дейінгі аралықты қамтиды. Ең қысқа маршрут №43 автобус (Полковничий аралы мен Жансая базарын жал-ғайды) 12,5 шақырымды құрайды екен. Ал ең ұзақ маршрут №24 (құс фабрикасы мен Химкомбимнат аралығында қатынайды).
Жаңа бағыттық желіге бұрыннан бар кейбір маршруттар №№ 15, 31, 129, 201, 218, 221, 224, 233 және 237 (9 маршрут) енгізілген жоқ. Бұл ерекшелікпен қатар №№ 203, 206, 212, 213, 231, 232 шағынавтобустарының бағыттарына өзгерістердің енгізілуі қаладағы негізгі магистральдағы көлік қозғалысын жеңілдетіп, жолаушылар үшін туындайтын қиындықтар біршама оңайлатылды. Атап айтсақ, көлік кептелісі мен жолаушылар мәселесі Әуезов даңғылы 17,3%, Қабанбай батыр көшесінде 14,4%, Интернационал көшесінде 12,7%, Шәкәрім даң-ғылында 27,3, Абай көшесінде 22,9%-ға азайды. Сонымен қатар, жаңадан тағы да 9 бағыт жолаушы тасымалдауға кірісті. Олар №№ 1, 4, 18, 24, 46, 37, 42, 47 и 52 бағыттағы шағынавтобустар.
Нәтиже бойынша тағы бір айта кетер жайт, бүгінде қала бойынша жолаушылар тасымалдауымен 6 мекеме айналысады. Шаһарда екі ұзақ мерзімді жолаушы билеттері бар. Ересектерге арналған мұндай билеттің құны 4000 теңге болса, оқушылар үшін 1200 теңгені құрайды. Қоғамдық көліктегі жүру бағасы өткен жылдың 1 сәуірінен бастап 60 теңгені құрады. Бұл жалпы республикамыздың өзге қалаларымен салыстырғанда біршама төмен баға болып табылады.
Жолаушылар көлігінде сонымен қатар көптеген жеңілдіктер қатары қарастырылған. Бұл жеңілдіктер жеткізушілер байқауында ескерілген болатын.
Өткен жылдың 1 тамызындағы байқаудың нәтижесінде жеткізушілер жасы 70-тен асқан зейнеткерлерді тегін тасымалдау туралы міндеттен бас тартты. Бұл жайт қала тұрғындарының тарапынан реніш туғызған болатын.
Семей қалалық ТҮКШ бөлімі өткен жылдың тамыз айында қала әкімінің орынбасарымен бірлесіп жиын өткізді. Онда қаладағы жолаушылар тасымалымен айналысатын мекемелер басшыларымен жол жүрудегі жеңілдіктер мәселесі бойынша басқосу ұйымдастырылды. Жиында аталмыш мәселелер көтерілді.
Атқарушы биліктің күш салуы нәтижесінде жеткізушілермен 70 жастан асқан зейнеткерлер мен ҰОС ардагерлерін және «Алтын алқа», «Күміс алқа» медалі иегерлерін қалаішілік автобустарда тегін тасымалдау жөніндегі келісімге қол жеткізілді. Осылайша қаладағы әлеуметтік мәселе шешімін тапты. Бұл жайт семейлік тұрғындардың жергілікті билікке, қала әкімі Айбек Кәрімовке деген ризашылық сезімдерін еселей түскені анық.
Семей қалалық ТҮКШ бөлімінің
материалдары бойынша
әзірлеген Қ.ӘЛІМБЕК
