Семей қаласындағы педагогикалық колледжде техникалық және кәсіптік білім беру мекемелері оқытушылары арасында волейболдан қалалық турнир өтті. Жарыс Қазақ хандығының 550 жылдығы мен қазан айының алғашқы жексенбісінде аталып өтілетін Ұстаздар күніне орайластырылған болатын. Спорттық шараға қала әкімі Ермак Сәлімов арнайы қатысып, сайыскерлерге сәттілік тіледі.
Колледж оқытушылары арасында ұйымдастырылған турнирге жалпы жиыны 4 құрама команда қатысты. Сайысты өткізудегі негізгі мақсат ұстаздар арасында салауатты өмір салтын насихаттау әрі жастар арасында бұқаралық спорт түрін қалыптастыру болатын. Әр команда 6 адамнан жасақталыпты. Оның ішінде екі нәзік жанды өкілдің болуы міндеттелген екен.
{jcomments on}Біріншіліктің ашылу салтанатында сөз алған шаһар басшысы Ермак Бидахметұлы қатысушыларға сәттілік тілеп, осындай спорттық шараларды жиі ұйымдастырудың мәні мен маңызы зор екенін тілге тиек етті.
— Құрметті сайысқа қатысушы оқытушылар қауымы! Сіздерді мейрамдарыңызбен атқарушы биліктің атынан құттықтаймын. Қазіргі сәтте жалауын көтеріп отырған сайыс, ұстаздар мейрамының құрметіне орай ұйымдастырылып отыр. Бұл жерде Алаштың атақ-абыройын асырған талай белгілі нар тұлғалар тәлім алған. Мұны үлкен мәртебе деп қабылдаған жөн деп ойлаймын. Сондай есімдері мәшһүр азаматтарға қарап бой түзеп, оларға лайық болу қажет. Сондықтан да тағы бір мәрте сіздерді кәсіби мейрамдарыңызбен құттықтай отыра, осы сайыста сәтті өнер көрсетулеріңізге тілектестік білдіремін. Спортпен шұғылдану денсаулыққа пайдалы екені белгілі. Сонымен қатар салауатты өмір салтын серік етудің экономикалық тұрғыдан да берер тиімділігі көп. Бұдан бөлек сіздерге қарап шәкірттеріңіз салауатты өмір салтын ұстанатын болады. Осы орайда дәл бүгін нағыз мықты команда топ жарады деген сенімдемін. Сіздерге сәттілік серік болсын, — деді өз сөзінде Ермак Бидахметұлы.
Осылайша, ойынға кезек беріліп, командалар өзара қарымта байқасуға кірісіп кетті. Тартысты өткен кездесу соңында жеңімпаздар мен жүлдегерлер арнайы кубоктар және мақтау қағаздарымен марапатталды.
Жақсылық МҰРАТҚАЛИ, «Семей таңы».
