Сенбі, 3 қазан күні қаланың сол жағалауында, Қазақ хандығының 550 жылдығына орай, шаңғы спортының жазғы түрінен біріншілік өтті. Салауатты өмір салтын тұрақты түрде насихаттауда түрлі спорттық шаралардың ортасынан табылатын қала әкімі Ермак Сәлімов те кәсіби шаңғышылармен сайысқа түсті.
{jcomments on}Спорттың бұл түрінен сайыс биыл төртінші мәрте өткізіліп, оған 50-ге тарта адам қатысуға ниет білдіріпті. Сайысқа қатысушылардың араларында кәсіби биатлоншылар, шаңғы спортының шеберлері, ардагерлер мен жас өрендер бар. Жарыс шаңғы спортының жазғы түрінен ұйымдастырылғандықтан, сайысқа қатысушылар шаңғы роллерімен бақ сынасты. Сайыс сол жағалаудағы халықтың көптеп жиналатын М.Әуезов алаңынан бастау алды. Үнемі спорттық шаралардың бел ортасында жүретін қала әкімі бұл жолы да өзінің шаңғы роллерінен кенде емес екенін көрсетті.
Жарыс басталмас бұрын сөз алған қала әкімі бұқаралық спортпен айналысудың тиімді жақтарын айта келе, қатысушыларға сәттілік тіледі.
— Қымбатты спорт ардагерлері және сайысқа қатысушылар! Бүгін салауатты өмір салтын насихаттайтын, жас буынға үлгі көрсететін жарысқа жиналдық. Ортамыздан алпыстың асуынан асып, сексеннің сеңгіріне шыққан белсенді өмірді ұстанатын көптеген ақсақалдарды көріп отырмын. Бұл — қуантарлық жағдай. Себебі спорт ардагерлерінің ортамызда болуы- өсіп келе жатқан жас ұрпаққа үлгі-өнеге. Қазіргі заманда дене шынықтырумен шұғылдану өте пайдалы әрі экономикалық тұрғыдан тиімді. Спортты серік еткен адамның денсаулығы мықты болатынын жақсы білесіздер. Сондықтан да барлық қала тұрғындарын салауатты өмір салтын белсенді ұстануға шақырамын, — деді өз құттықтауында Ермак Бидахметұлы.
Сонымен қатар жарыс жолына өзгелермен бірге шаңғы биатлонынан Әлем чемпионы Галина Вишневская, Сочиде өткен қысқы Олимпиада ойындарында еліміздің туын көтерген жерлесіміз Ердос Ахмадиев те шықты. Биыл Ердос ҚР-ның чемпионатында 2-ші орынға табан тірепті. Алда Ердос үшін Әлем кубогі кезеңіне қатысуды көздеп отыр екен.
— Қазақ хандығының 550 жылдығын ел көлемінде атап өту жалғасуда. Осындай мерейлі мезеттерге арналып өтіп жатқан шаралардан шет қалмауды жөн көрдік. Осы сайыс келер жылы да өз жалғасын табады деген сенімдемін. Міне, қала басшысы да жарысқа қатысу үстінде. Бұл — қала тұрғындарына үлгі боларлық іс,- дейді Е. Ахмадиев.
Сайыс барысында шаңғышылар Әуезов даңғылы бойымен 5 шақырымнан аса қашықтықты жүгіріп өтті.
Жақсылық МҰРАТҚАЛИ, «Семей таңы»
