«Ұстаз тумысынан өзіне айтылғанның бәрін жетік түсінген, көрген, естіген және аңғарған нәрселерінің бәрін жадында сақтайтын, олардың ешбірін ұмытпайтын, алғыр да зерек ақыл иесі, өте шешен, өнер-білімге құштар, аса қанағатшыл, жаны таза және әділ, жұртқа жақсылық жасап, үлгі көрсететін, қорқу мен жасқануды білмейтін батыл, ержүрек болуы керек». Шығыс ойшылы Әбу Насыр әл-Фарабидің осынау қанатты сөзінің мәні зор. Ал аталған мамандық иесінің ұрпақ тәрбиесіндегі алар орны ерекше. Демек, білім сапасын көтерудің негізгі тетігі – ұстаз.
Қазан айының алғашқы жексенбісі — ұстаздардың төл мерекесі. Жыл сайын дәстүрлі түрде қазан айының алғашқы күнінде аталып өтілетін мереке қарсаңында семейлік ұстаздарды қала әкімі Ермак Сәлімов арнайы құттықтады.
{jcomments on}Салтанатты жиында сөз алған қала әкімі Ермак Бидахметұлы білімді, жан-жақты қабілетті ұрпақ – ұлтымыздың баға жетпес қазынасы саналатынын, бүгінгі қоғамда ұстаздар қауымының мәртебесі жоғары екенін атап өтті.
— Құрметті ұстаздар! Білім беру саласының ардагерлері! Сіздерді кәсіби мерекелеріңізбен шын жүректен құттықтаймын. Сіздер әр оқушының жан дүниесін нұрландырып, жүрегіне шапағат сыйлайсыздар. Ұстаздың ғана бағытымен жас ұрпақ өзінің болашақ бағдарын айқындай алады. Ұстаз деген құрметті де игілікті мамандық иелерінің тәлімді тәрбиесі негізінде еліміздің өркендеп, алға басатыны анық. Мұғалімдер — өздерінің жеке өмірлерінің мәселелерін ысырып тастап, өзгелердің бақытын әрі келешегін ойлайтын мейірімді жандар. Сіздерге шығармашылық табыс тілеймін. Осы ретте ардагер ұстаздарға айрықша алғысымды білдіргім келеді. Себебі сіздер қаламыздың білім беру саласының өркендеуіне өзіндік үлестеріңізді қостыңыздар. Сіздер осы күнге дейін аға буын мен жас ұстаздар арасындағы сабақтастықты сақтауда ақыл-кеңестеріңіз бен мол тәжірибелеріңізді бөлісіп келесіздер. Сіздердің кәсіби шеберліктеріңіз уақытпен дәлелденген, — деді өз құттықтау сөзінде Ермак Бидахметұлы.
Сахна төрінде шаһар басшысы білім беру саласындағы үздіктерді қала әкімінің құрмет грамотасымен марапаттады. Атап айтқанда, Түрксіб жалпы орта мектебінің мұғалімі А. Қалиев, № 9 орта мектептің ұстазы С. Масленникова, Приречный орта мектебінен О. Мұхамеджанова, № 32 орта мектептің тәрбие ісі жөніндегі орынбасары Ш. Саяхимова, № 16 орта мектеп мұғалімі Ж.Нұрлыбаева, № 21 орта мектеп ұстазы М.Серікбаева және № 1 кешкі мектептің мұғалімі – К.Қайранбаев қала әкімінің құрмет грамотасымен марапатталды. Ал №37 мектеп – гимназиясының тарих пәнінің мұғалімі Қуат Оразалин «Жылдың ең үздік ұстазы» болып танылды. Айта кету керек, Қуат Аманжолұлы «Жылдың үздік педагогі – 2015» республикалық байқауында жеңімпаз атанған еді. Кеш соңы балғын өнерпаздардың шағын концерттік бағдарламасымен жалғасын тапты.
Жақсылық МҰРАТҚАЛИ, «Семей таңы»
