27 қыркүйек пен 3 қазан күндері Малайзияның Куала-Лумпур қаласында армрестлингтен (қол күрес) кезекті Әлем чемпионаты болып өтті. 37-ші мәрте ұйымдастырылған жаһандық біріншілікте әлемнің 68 мемлекетінен 800-ге тарта спортшы бақ сынап, кіл мықтылар анықталған. Жастар мен ардагерлер арасында өткен жарыста Қазақстан құрамасы жалпыкомандалық есепте Ресейден кейін ІІ орынды еншіледі. Байрақты бәсекеде ұлттық команданың сапында 2 семейлік сайыпқыран өнер көрсетіп, жүлдегерлер қатарынан орын алған. Бұл орайда аталмыш жарыстан жүлделі оралған әлем чемпионатының қола жүлдегерлері Ондархан Шылғауов пен Архат Тыныбаевтың қатысуымен қалалық ақпарат орталығында баспасөз мәслихаты өтті.
{jcomments on}Баспасөз мәслихатына Семей қаласы дене шынықтыру және спорт бөлімінің басшысы Мұрат Құржықаев, армрестлингтен қала құрамасының бас жаттықтырушысы Төлеген Сағатаев қатысты. 75 келіде ардагерлер арасында жарыс жолына түскен Ондархан Шылғауов баспасөз мәслихатында ақтық мәреге дейін жету оңайға түспегенін жеткізді. Дей тұрғанмен алпыстың асуынан асқан қарымы мығым ақсақал өзге елдің егде жастағы спортшыларына есе жібермей, ел намысын абыроймен қорғаған.
— Ең алдымен осындай дүбірлі додаға баруға демеушілік көрсеткен өңірімізге белгілі кәсіпкер Мұхит Тұмабаевқа айтар алғысымыз шексіз. Ал сайысқа келер болсақ, Әлем біріншілігі болғандықтан, ол жерге әркімнің жеңіске жетемін деп баратыны анық. Менің салмағымда 17 адам күш сынастық. Олардың арасында осалы жоқ. Әр кездесуім талас-тартысқа толы болды десем, артық айтқандығым болмас. Өзім осы қол күреспен 3 жылдың көлемінде шұғылданып келемін. Жасыратыны жоқ, мұндай бәсі мықты турнирде кәнігі спортшылармен тең дәрежеде иық тіресу қиынға соқты. Соған қарамастан, ел қоржынына олжа салдық. Өкінішке орай жаттықтырушымыз бізбен бірге бара алмады. Егер де бапкеріміз жанымызда болса, бәлкім, алтыннан алқа тағуымыз мүмкін еді. Алайда алдағы жарыстарда олқылықтарымызды ескеріп, жоғары нәтижеге қол жеткіземіз деген ойдамын,- дейді О.Шылғауов.
Ал 21 жасқа дейінгі жастар арасында білек күшінің мықтылығын байқаған Архат Тыныбаев чемпионат барысында 5 кездесу өткізген екен. Жас спортшының айтуынша, оның салмағында да дүниежүзінің «сен тұр, мен атайын» дейтін оғландары жиналыпты. Араларында Жапония, Грузия және Ресей елінен әлемге әйгілі спорт саңлақтары болыпты. Дегенмен Архат қарсыластарының даңқ пен абыройларына қарамай, өзінің осал еместігін дәлелдей білген. Енді жерлес саңлақ келер жылы Болгарияда жалауын көтеретін Әлем чемпионатында топ жаруды жоспарлап отыр. Бұдан бөлек, қол күрестен шаһардың бас жаттықтырушысы Т.Сақатаев алдағы уақытта Польшада мүмкіндігі шектеулі жандар арасында өткізілетін халықаралық додаға дайындықтарын жүргізіп жатқандықтарын атап өтті. Оған Семейден Данияр Тайменов есімді азамат аттанады деп күтілуде.
Жақсылық МҰРАТҚАЛИ,
«Семей таңы»
