ШҚО әкімі Даниал Ахметов Семей қаласына таяуда жасаған жұмыс сапарында алдағы жылыту маусымына ертерек қамданып, әлеуметтік нысандарға ғана емес, жалпы қала бойынша мезгілінен бұрын жылу беруді тапсырған болатын. Жаз бойы дайындық жұмыстары тиянақты жүргізілген жылыту көздері биылғы жылу беру маусымын уақытынан сәл ертерек бастады.
Семей қаласы ТҮКШ жолаушылар көлігі және автомобиль жолдары бөлімінің сейсенбідегі ақпаратынша, жылу ең алдымен шаһардағы білім, денсаулық сақтау және әлеуметтік нысандарға қазан айының 2-ші жұлдызынан бастап, ал 7 қазаннан бастап көп қабатты тұрғын үйлерге беріле бастаған.
ТҮКШ бөлімінің мәліметіне сүйенсек, бүгінгі күні жылыту маусымына дайындалмаған, салдарынан жылуды қабылдай алмайтын 32 тұрғын үй алаңдаушылық тудырып отыр. Оның үстіне Жамақаев көшесі, 219, Синицин көшесі, 5, Дулатов көшесі, 206, Аюченко көшесі, 6 және 15-ші үйлер «Теплокоммунэнерго» МКК-ға қомақты берешектері бар екен.
Алдағы жылыту маусымына қажетті көмір қоры да жеткілікті. Семей қаласының қысқы жылу маусымына республикалық бюджеттен 1 млрд. 200 млн. теңге бөлінген. Бүгінгі күні көмір жеткізу келісім- шарттары жасалып, қатты отын кесте бойынша тасымалданып отыр. Сала мамандары алдағы уақытта көмір тапшылығы болмайды дейді.
Семей қаласы ТҮКШ жолаушылар көлігі және автомобиль жолдары бөлімінің мәліметіне сүйенер болсақ, бүгінгі күні шаһардағы 632 үй жылуға қосылса, 350 баспана ыстық сумен қамтамасыз етілген.
Асан МЫРЗАХАНОВ,
«Семей таңы»
