Балалар және жастар шығармашылығы сарайында Радиотехника және байланыс колледжінің 75 жылдық мерейтойы кеңінен аталып өтті. Радиотехника және байланыс колледжі – техникалық бағытта білім беретін оқу орындарының ішіндегі байланыс саласы мамандығы бойынша оқытатын өңірдегі бірден-бір білім ордасы.
Аталмыш білім ошағының 75 жылдық мерейтойына ШҚО білім басқармасы басшысының орынбасары Алла Нурсеитова, қала әкімінің орынбасары Надежда Шарова мен қалалық мәслихат хатшысы Бейсенбек Ақжалов және байланыс саласының ардагерлері мен колледждің ардагер ұстаздары, әр жылдардағы түлектер, оқытушылар мен студенттер қатысты.
{jcomments on}Мерекелік шара барысында Радиотехника және байланыс колледжінің директоры Оралхан Сартаев БАҚ өкілдеріне сұхбат берген болатын.
— 75 жыл — мерейлі дата. Осы уақыт ішінде колледжден сан мыңдаған маман иелері түлеп ұшты. Бүгінде олардың біршамасы еліміздің және өңіріміздің бірқатар аумақтарында байланыс саласы бойынша басшылық қызметтер атқаруда. Осыдан 50 жыл бұрын аудио-бейне техникаларды жөндейтін радиомеханик мамандары даярланса, осыдан 20 жыл бұрын бағдарламашылар, яғни компьютерлік құрылғылар бойынша қызмет көрсететін мамандар даярлана бастады. Бүгінде «Қазақтелеком» АҚ мен «Қазпошта» АҚ компанияларымен тығыз байланыста жұмыс істейміз. Қазіргі уақытта колледжде осы екі ірі компанияға мамандар даярланады, — деген Оралхан Иманғалиұлы сұхбат барысында аталмыш білім ордасының тарихына тоқталып, бүгінгі күндегі жұмыстары жайлы кеңінен әңгімелеп өтті.
Шара барысында сөз алып, колледж ұжымын атаулы мерекелерімен құттықтаған ШҚО білім басқармасы басшысының орынбасары Алла Нурсеитова облыстық білім басқармасы басшысы Асқар Нұрғазиевтің құттықтау хатын оқып, қаржылай сыйлықтың сертификаты мен бағалы сыйлықты салтанатты түрде табыс етті. Сонымен қатар Гүлнар Бәкішева, Қадыр Слямшакұлы сынды бірқатар оқытушыларды облыстық білім басқармасы басшысының грамоталарымен марапаттады.
Қала әкімінің орынбасары Надежда Шарова колледж ұжымын қала әкімі Ермак Сәлімовтің атынан құттықтап, өзінің жылы лебізін білдірді. Ал өз кезегінде қалалық мәслихат хатшысы Бейсенбек Ақжалов Жанат Сүлейменова, Гүлия Қонақбаева, Фарида Шалова сынды бірқатар оқытушыларға қалалық мәслихаттың грамоталары мен алғыс хатарын табыстады.
Сондай-ақ мерекелік шара барысында колледж директоры Оралхан Сартаев Алла Нурсеитова, Надежда Шарова, Бейсенбек Ақжалов сынды және басқа да мәртебелі меймандар мен әр жылдардағы түлектерге «Радиотехника және байланыс колледжіне 75 жыл» мерекелік медалін табыс етті. Сонымен қатар білім мекемесінің басшысы колледждің ардагерлері Абдулхамит Валиев пен Любовь Ершованы және пошта байланысы саласының ардагері, бүгінде колледждің техникалық мұражайының меңгерушісі Манарбек Молдарахимовты «Еңбек сіңірген қызметкер» төс белгісімен, ал колледж оқытушылары Гүлжанат Борубаева мен Рымтай Нұралинаны және Юрий Рыбалкинді «Құрметті қызметкер» төсбелгісімен марапаттады.
Ардагерлер де өз кезектерінде сөз алып, өздері еңбек еткен білім ошағына деген ізгі тілектерін айтты. Мерекелік шара қала өнерпаздарының концерттік бағдарламасына ұласты.
Нұрдәулет КӘКІШЕВ,
«Семей таңы»
