Жуырда Үржар ауданындағы Көктерек, Қарабұта, Ақшоқы ауылдық округтерінің әкімдері арнайы кесте бойынша жиын өткізіп, өткен жылы атқарылған жұмыстары жайлы есеп берді. Бұл жиындарға аудан әкімі Серік Зайнулдин қатысып, бірқатар сауалдарға жауап беріп, келер жылдың жоспары пысықталып, халықтың ой-пікір, ұсыныстары сараланды.
Көктерек — жаз жайлауы келіскен, берекелі ауыл. Осы күз айында ғана белгілі кәсіпкер, жерлесіміз Серікболат Бейсекенов басқаратын «ЦАРП» ЖШС мұнда жаңа амбулатория үйін салып берген, қазір жұмыс жасап тұр. Алайда, Көктерек орта мектебінің қазандығының жеткілікті мөлшерде жылу бере алмауы себепті оқу орнының іші салқын. Осыдан екі жыл бұрын ғана салынған қазандықтың іші ыс, түтіндеп кетеді. Аудан басшысы жылу қазандығына от жағушылардың рұқсат қағаздарының, куәліктерінің бар-жоғын сұрап білді. Мұнда бір ғана жылу қазандығы істеп тұр, екіншісін мектеп директоры көмір үнемдеу мақсатында әлі қоспаған. Аудан әкімі С.Зайнулдин тез арада мектеп ішін жылытып, тиісті шараларды қолдануға тапсырма берді.
Ауыл әкімі Тұрарбек Қасеновтың есепті баяндамасында олқы түсіп жатқан іс-шаралар да айтылды. Осы округке қарайтын Қайыңды, Қызылбұлақ ауылдарының да мектептері жұмыс істеп тұр. Биылғы оқу жылында Қа-йыңдыда 2 қабатты, 80 орындық мектеп ғимараты пайдалануға берілген, бұған жергілікті халық ризашылықтарын білдіруде. Алайда, жұрт бос тұрған мәдениет үйін күрделі жөндеу-ден өткізіп беруді сұрады. Сонымен қатар, мал өнімдерін өткізудің қиын екенін айтып, ауылда табын ұйымдастыру, су құбыры жұмысын жал-ғастыру (шеткі көшелерге жетпеген), жол мәселесі жайлы ұсыныс-пікірлерін ортаға салды. Жиын соңында ауыл әкімінің жұмысына «қанағаттанарлық» деген баға берді. Мұндай мәселелердің көпшілігі Қарабұта ауылында да бол-ған. Қазір біртіндеп шешіліп келеді. Қарабұта жаңарған, жасарған. Көшелер жарықтандырылып, жаңа мектеп пайдалануға беріліп, емхана салынып, жаңадан тәжірибелі дәрігерлер келген. Ғимаратты «ЦАРП» ЖШС салыпты. Айта кетерлігі, бір ауылда осындай екі үлкен құрылыс нысанының салынуы тіпті, Кеңес дәуірінде де болмаған жайт.
— Бұл жетістіктер Елбасы Н. Назарбаевтың салиқалы басшылығының, өркендеп келе жатқан мемлекетіміздің, елдегі тұрақтылықтың арқасында, облыс әкімі Бердібек Сапарбаевтың жүйелі тапсырмасымен жасалып жатқан оңды істер. Біз тек орындаушылармыз. Мақаншы ауылдық ауруханасының бас дәрігері, облыстық мәслихаттың депутаты Нағима Жақияноваға алғыс айтыңыздар, сол кісі осы өңірдегі денсаулық саласын биік белестерге көтеріп келеді, -деді аудан басшысы Серік Зинабекұлы.
Иә, мектеп ғимаратының құрылысы қиындықпен тәмамдалды. Айтпасқа болмайды: тек аудан әкімі Серік Зайнулдиннің тікелей бақылауында болып, күш салуымен, жұртты ұйымдастырып, асарлатып аяқтауы ерен еңбектің көрінісі болды. Рас, әлі де бұл іске толық нүкте қойылған жоқ. Қалай болғанда да қарабұталықтардың қуаныштарында шек жоқ. Округ әкімі Мұратбек Шөмшеков клуб үйіне жиылған халық алдында атқарылған ауқымды істер жайлы баяндама жасады. Қолға алынар жұмыстар да жетерлік екен. Ол- Сабаз өзенінен насоспен су шығару, «Жастар» саябағын жарықтандырып, абаттандыру, аудан орталығы мен екі ортаға жолаушы тасымалдайтын автокөлік шығару, ескі мектеп ғимаратын күрделі жөндеуден өткізу, жастардың спортпен айналысулары үшін жағдай туғызу, Қара-бұта-Атығай жолын күрделі жөндеуден өткізу секілді кезек күттірмес мәселелер. Ауыл әкімінің жұмысына тұрғындар риза екендіктерін жасырмады. Сөз алған ауыл тұрғындарының баршасы Елбасының жүргізіп отырған саясатының өміршеңдігіне, облыс әкімінің қамқорлығына, аудан әкімі С. Зайнулдиннің еңбектеріне зор баға берді, ауыл әкіміне де қанағаттанатындықтарын жасырмады. Мұндай кездесу жырақтағы Ақшоқы ауылдық округінде де өтті. Айта кетерлігі, барлық округтерде де жұрт көп жиналып, өз ойларын ашық білдіріп жатты. Ауданның ең шеткі нүктесіне жататын бұл округті өткен жылы аусыл ауруы шарпып, мүйізді ірі қара мен қой түлігі шығынға ұшыраған-ды. Алайда, мемлекет орнын толтырып, төлеп берген. Жергілікті халық ол қаржыға асыл тұқымды мал сатып алып жатыр.
Ақшоқы округінде омарта шаруашылығымен айналысатындар саны да артып келеді. Күзден бері барлық ауылдарда жүргізіліп келе жатқан көшелерді жарықтандыру жұмыстары мұнда да қарқынды. Ауыл әкімі Ырысбек Саржановтың айтуынша, «Қазагроқаржы» АҚ арқылы несиеге алынған ауылшаруашылық техникаларының саны арта түскен. Қылмыстан ада бұл ауылда да өзге елді мекендерде-гідей халық жасақшылары өз жұмыстарын бастапты. Учаскелік инспектор Марат Керімқұловқа «Сарбаздар» тобының жетекшісі Нұрқан Нұрым үлкен көмекші. Рас, ел болған соң мұнда да кемшіліктер бар. Ауыз су мәселесі алдыңғы орынға шыққан. Мәдениет үйін күрделі жөндеуден өткізу керек. Жедел жәрдем де қажет.
— Серік Зинабекұлы, сіз ауданға әкім болып тағайындалғалы осы Ақшоқы ауылына бірнеше рет келіп, хал-ахуалымызбен танысудасыз. Баспасөз беттерінен сіздің елге еңбегі сіңген қарттарға зор көңіл бөліп келе жатқаныңызды білеміз. Бұл үлкен көрегендік, үлкен тәрбие. Аудан көлемінде аз уақыттың ішінде біршама іс тындырдыңыз, -дейді ауыл тұрғыны Мұратбек Балғабаев.
— Ақшоқы ауылдық округі шекаралық аймақ болғандықтан, бөлек көзқарасты қажет етеді,-деді аудан әкімі Серік Зинабекұлы, — Мемлекет тарапынан мал басын арттыру үшін көптеген бағдарламалар қолға алынған. Алайда, біз соларды дұрыс пайдалана алмай келеміз. Же-ңілдетілген несие алғандардың саны аз. Жалпы, Елбасы бізге үлкен талаптар қойып отыр. Облыс әкімі Бердібек Мәшбекұлының бізге сеніп тапсырған үлкен істердің үдесінен шығуға талпынудамыз. Баяғы кеңес заманында бір аудан бір жылда екі мектеп салса, аты бәйгеден келгендей той жасайтын. Қазір ше!? Ауданымызда 15 мектеп бір жылда салынуда. Оның жартысы аяқталды, біразы тәмамдалуға жақын, салғырт қарағандарды сотқа бердік. Алайда, биылғы жылы мектеп ғимараттарының құрылысын аяқтаймыз. Бұған сеніңіздер.
Аудан басшысы бұдан соң елді мекендерді абаттандыру, ауыл тазалығы тәрізді өзекті мәселелерді тілге тиек етті. Шынында да Ақшоқы ауылына С. Зайнулдин тарапынан жуырда ғана «МТЗ» тракторы, «Нива» автокөлігі берілген. Бұған ауылдықтар разы.
Аудан әкімі Серік Зайнулдин жиын өтетін барлық ауылдардың мектептерін аралап, асхана, жылу қазандығы секілді нысандарында болып, жұмысшыларымен тілдесті.
