Жуырда, Президент Нұрсұлтан Назарбаев Қазақстан халқына дәстүрлі Жолдауын арнаған күннің ертеңінде Үржар ауданының әкімі Серік Зинабекұлы Зайнулдин Бестерек ауылдық округінде еліміздің басты құжатын тал-қылауға байланысты Бестерек, Ақжар ауылдарында актив өткізіп, соңынан кесте бойынша округ әкімдерінің есептерін тыңдады. Ол биылғы «Қазақстан жолы-2050»:Бір мақсат, бір мүдде, бір болашақ» атты Жолдаудың ерекшеліктеріне тоқталып, әр сала бойынша басым бағыттарын түсіндірді.
— Елбасының жыл сайынғы Жолдауларының әрқайсысының орны бөлек, айтар ойы мағыналы, ел тағдырын шешетін құнды құжат.
Елдің еңсесі Елбасымен биік. Жолдаумен танысқан әр азаматтың болашаққа деген сенімінің нығая түсетіні анық. Өйткені, мақсат айқын: ол әлемдегі ең дамыған 30 мемлекеттің қатарына қосылу. Ол күн де алыс емес. Енді бір 5 жылда мемлекетіміз адам танымастай өзгереді. Оның жарқын дәлелінің бірі – «Мәңгілік ел» идеясын жүзеге асыру, ел тарихындағы біз аяқ басатын жаңа дәуірдің кемел келбетін айқындау. 2050 жылға дейін 35 жыл қалды. Яғни, 7 бесжылдық. Бұл көп уақыт емес. Қазақстан халқының бұл межеден де табысты өтетіні анық. Елбасы Нұрсұлтан Назарбаев«Мәңгілік ел» идеясы тақырыбын жақсы көтерді. Халықтың әлеуметтік тұрмысының жыл сайын арта түсетіні ақиқат. Мәселен, Елбасы аталмыш Жолдау-да бірқатар сала қыметкерлерінің еңбекақыларының біртіндеп өсетінін айтты. Атап айтқанда, 2015 жылдың 1 шілдесінен мұғалімдердің жалақысы 29 пайыз, денсаулық саласының айлығы 28 пайыз, әлеуметтік сала қызметкерлерінің еңбекақысы 40 пайыз өсетінін жеткізді. Сол сияқты, өздеріңізге мәлім, Елбасы еліміздің болашағы студенттердің де шәкіртақылары 2016 жылдан бастап 25 пайызға көбейетінін айтып өтті,-деді аудан әкімі Серік Зинабекұлы. Сондай-ақ, Азаматтық қызмет туралы тұжырымдаманың да жуық арада жасалатынын, елімізде атом электростанциясы құрылыстарының қолға алынатындығын, елдің күре тамыры- жолдарды жасаудың жылдамдатып қолға алынатындығын тілге тиек етті. Жолдауда «Астана-Қарағанды-Алматы», «Астана-Павлодар-Өскемен», «Алматы-Қапшағай-Өскемен» бағыттарындағы автострадалардың да жуық арада салынатыны айтылған.
— Өздеріңізге мәлім, -деді аудан басшысы, 1989 жылы қазақ тіліне мемлекеттік мәртебе берілгеннен бері біршама істің басы қайырылды. Қазақ тілі қарым-қатынас тілінен мемлекеттік тіл дәрежесіне көтерілді. Бүгінде өзге ұлт өкілдерінің қазақ тіліне деген, оны үйреніп сол тілде сөй-леуге деген құштарлығы, ынтасы мен ықыласы өте үлкен. Президентіміз Нұрсұлтан Әбішұлы Назарбаев осы Жолдауында қазақ тілінің дамуына 2010 жылдан бері 10 млрд. теңге бөлінгендігін, соның арқасында қазақ тілін білетін өзге ұлт өкілдерінің саны 10 пайызға артқанын, «Балапан» бағдарламасын жүзеге асыру одан әрі жалғасатынын, сол үшін елді мекендердің барлығында сәбилерге арналған балабақшалардың салынып, Президентіміз 2020 жылға қарай 3 жас пен 6 жас аралығындағы бүлдіршіндердің мәселесі 100 пайыз шешілетіндігіне тоқталды.
Осылайша аталмыш құжат жария болған күннің ертеңіне аудан әкімі Серік Зайнулдин биылғы «Қазақстан жолы-2050»: Бір мақсат, бір мүдде, бір болашақ» атты Жолдаудың басым бағыттары мен ерекшеліктерін жұртшылыққа сала-сала бойынша түсінікті тілмен баяндап берді. Бестерек, Ақжар ауылдық округтерінің халқы Елбасының биылғы Жолдауының мақсат-мүддесінің жұрт тілегімен үндесіп жатқанына тағы бір рет көз жеткізді.
