Елбасы, «Нұр Отан» партиясының Төрағасы Нұрсұлтан Назарбаев өткен жылдың басында Үкіметтің кеңейтілген мәжілісінде «Нұр Отан» партиясының қоғамдық қабылдау орындарында жергілікті мемлекеттік органдар басшылары мен барлық деңгейдегі әкімдер, құқық қорғау органдарының басшылары азаматтарды жеке өтініштері бойынша жүйелі түрде қабылдау өткізу керектігіне баса назар аударған болатын.
Елбасының тапсырмасын орындай отырып, қала тұрғындарының жеке мәселелерін қарас-тырып, оларды шешу мақсатында өткен жұма күні «Нұр Отан» партиясының Семей қалалық филиалының төрағасы, қала әкімі Айбек Кәрімов азаматтарды жеке сұрақтары бойынша қоғамдық қабылдау жүргізді.
«Қала әкімі қоғамдық қабылдау жүргізеді» дегенді естіген тұрғындар партияның ғимаратына көп жиналды. Айбек Мүталапханұлы қабылдауға жазылған отыздан астам адамның талап – тілегін, арыз – шағымын үш сағатқа жуық мұқият тыңдады. Арыз айта келгендердің мәселелері де түрлі деңгейде. Бірі – баспананың жағдайын айтса, бірі – аялда-маның алыстығын тілге тиек етті. Ал, келесі бір адам жұмыстан шығып қалып, қайта жұ-мысқа тұруына жәрдем сұрайды. Міне, осылайша арыз айтып келгендердің қарасы жалғаса берді.
Владимир Евдокимов қала әкімінің қоғамдық қабылдауына кірген алғашқы азамат. Саяжайлықтардың ортақ мәселесіне айналған ұрлық – қарлықтың қатары көбейгендігін айта келді. Оған түрткі болған жайт та бар. Владимир Анатольевичтің Шығыс кентіндегі саяжайын тонап, мүлкін ұрлап кеткен. “Ұрылардың ізін кесіп, қолына кісен салатын тәртіп сақшылары қауқарсыздық танытып отыр”,- дейді шағымданушы азамат. Қала әкімінің қоғамдық қабылдау жүргізетіндігін естегін бетте, мәселесін ашық айтуды жөн көріпті. Владимир Евдокимов Шығыс кен-тіндегі саяжай тұрғындары атынан қоғамдық тәртіпті сақтауды күшейтіп, назарға алуда қала әкімінен пәрмен беруді сұрады.
Айбек Мүталапханұлы арыз әкелген азаматтың шағымы орынды екендігін атап өтіп, шара қолданылып, мәселенің оң шешімін табатындығын жеткізді.
Жеке меншіктегі тұрғын үйінің төбесін жабуға көмек сұрай келген Тұраш ақсақал Әлсейітов. Әлбетте, жеке меншіктің қарамағындағы үйлерге атқарушы билік тарапынан қандай да бір көмек көрсету заң шеңберінде қарастырылмаған. Сондықтан, қала әкімі зейнеткерге балаларының көмегіне жүгіну керектігін айтты. Қала басшысы арыздарын қарайтындығын, жерде қалмайтындығын да жеткізді.
Шульбинский Заезд көшесінің тұрғындары атынан Алмабек Наетов атты азамат электр жарығымен қамтамасыз етуге көмек көрсетуді сұрай келген. Бұл көше Жоламан кентіне қарама – қарсы, Суық бастау кентіне барар жолдың бойында.
— «Нұр Отан» партиясының халықтың әлеу-меттік мәселелеріне етене жақын екендігін, оны шешу жолында жүйелі жұмыстар жүргізіп отырғандығының куәгеріміз. Семей шаһарындағы партияның басшысы ретінде көше тұрғындарының жарық мәселесін көтере келдім. Бұрындары осындай қоғамдық қабылдаулар сирек болатын. Өзіңіз қалаға басшылыққа келгелі халықпен тығыз қарым – қатынастасыз. Біздің сізге көмек сұрап келгеніміз де мәселемізге мән беріп, оңынан шешілуіне көмектеседі деген үміт болғандықтан еді, — деген өтінішін айтты.
Айбек Мүталапханұлы бұл көшенің мәселесі өзінің жіті бақылауында екендігін жеткізді. Сәтін салса, алдағы жылдары ықшам ауданның іргесі қаланады. Жалпы, ықшам ауданды жарықтандыру үшін 900 млн. теңге қаражат та қарастырылған. Тек жарияланған байқаудың нәтижесі ғана күтілуде. Су мен кәріз жүйелері тартылып та жатыр.
— Суық бастауға баратын жол жасалып, көпір ретке келді. Көпқабатты тұрғын үйлер де салынатын болады. Сондықтан, ол жақтың жарығы жақын арада жөнге келеді. Сіздер тұратын аумақ жаңаша кейіпке енеді, — деп атап өтті қала басшысы.
Энергетик кентінің тұрғындары атынан келген Петр Коломин де өз ойын ортаға салды. Петр Михайлович жеке басының мәселесі емес, тұтастай кент тұрғындарының ортақ мәселесін қала басшысына жеткізді.
Соңғы жылдары Энергетик кентіне жан бітіп, көпқабатты тұрғын үйлер де көптеп салына бастағанын шаһар тұрғындары жақсы біледі. Осыған орай қала әкімінің ықпалымен кентке кірер жол тегістеліп, тұрғындар үшін қолайлы жағдай да жасалған. Алайда, жаңа жолмен жүйтки жөнелетін автокөліктер жылдамдықты шамадан тыс арттырып жатады. Міне, қарияны алаңдататын да осы мәселе. Тамыз айында ТҮКШ бөліміне барып, жылдамдыққа тежеу болар жол белгісін қоюды сұрапты. Жауаптылар «жарайды» дегенімен, әлі күнге дейін бұл мәселе сол күйінде қалып отыр.
Осы ретте қала басшысы көшенің тарлығын тілге тиек етті. Көшенің жүргіншілерге қолайлы болуы үшін болашақта бірқатар өзгерістер орын алады деп жоспарлануда. Ол жерде жанармай құю бекеті де қолайсыз орналасқан болса, бұрыннан қалған тал – теректер де кедергі келтіруде. Айбек Мүталапханұлы осы жылы қаражат қарастырылып, бұл аумақтың қалыпқа келтірілетіндігін айтып өтті.
Ал, Степной кентінен келген Гүлжәмила Түсіпбаева аялдаманың алыстығын айта келген екен. Степной кентінде мектеп жасындағы балалары бар тек Гүлжәмила апай ғана емес. Ауылдан қоныс аударған ағайындардың жеке меншік баспаналарының көптеп салуының нәтижесінде Степной кенті соңғы аялдамадан едәуір алыстап кетті. Қазір соңғы аялдамаға дейін бірталай жер. Гүлжәмила апай осыған орай автобус аялдамаларының жұртқа қолайлы болу жағы қарастырылса деген өтінішпен келіпті.
Айтжан Оспанова атты тұрғын қала әкімінің алдында баспана мәселесін сөз етті. 1989 жылдан бастап отағасы тұрғын үйдің кезегінде тұрған. Ол кісі өмірден озған соң, сол кезек тұрғын үй қатынастары туралы заңға сәйкес, Айтжан Оспановаға ауыстырылған. Ал, Айтжан апа болса, өзінің кезекте тұрғандар санатында жоқ екендігін айта келіп, қала әкімінен әділдік іздей келген.
Айбек Мүталапханұлы кезекте тұрған ешкім де баспанасыз қалмайтындығын осы жерде тағы бір мәрте атап өтті. Кезекте тұрған барлық тұлғаларға уақытында, кезегі келген сәтте тұрғын үй қатынастары туралы заңға сәйкес, баспана берілетіндігін жеткізді. Ал, Айтжан Оспанованың мәселесін дер кезінде анықтап беруді ТҮКШ бөлімінің баспана саласына жауапты тұлғаларына тапсырды.
Айтпақшы, қала әкімі баспана бөлуде ең бірінші кезекте мүмкіндігі шектеулі жандарды қамтамасыз ету керектігіне ерекше тоқталды.
— Бірінші кезекте ҰОС ардагерлерін баспанамен қамтамасыз ету міндеті бізде мінсіз орындалды. Ата – ананың қамқорлығынсыз қалған жандардың да баспана мәселесі өз шешімін тауып келеді. Ал, мүмкіндігі шектеулі жандарды баспанамен қамту да біздің назардан тыс қалмайды. Жетім балаларға да баспана берілді. Енді мүмкіндігі шектеулі топтың да жағдайын жасауымыз керек, — деп атап өтті Айбек Мүталапханұлы.
Қала әкімінің алдына, әсіресе, баспана мәселесіне қатысты келгендер көп болды. Жатақханамен қамтамасыз етуге көмек сұрай келгендердің де қатары көп екендігіне көз жеткіздік. Ұзын саны отыздан астам тұрғынның арызын тыңдап, шағымын естіген қала әкімі барлығы да жауапсыз қалмайтындығын атап өтті. Тиісті мекемелер жақын арада нақты жауабын беретін болады.
Ерзат ЖАНАТҰЛЫ, «Семей таңы»
