Семейде әлеуметтік тұрақтандыру қорының ұйымдастырылып, жұмыс істей бастағанына биыл үш жыл болды. Бұрынғы жылдарға қарағанда ағымдағы жылы аталмыш қор қызметі біршама ширап келеді. Халыққа сапалы қызмет көрсетуде де жетістіктер мол. Мәселен, өткен жылдың осы мерзімінде қала бойынша 22 нысанда қызмет көрсетілсе, биылғы жылы олардың саны 40-қа жеткізілді.
— Биылғы жылы аймақтық тұрақтандыру қорының өнімдерін сауда нүктелерінің өтініштері бойынша «Шығыс самғау» ЖШС жеткізетін болады. Тұтынушыларға қызмет көрсететін нысандардың мекенжайлары нақтыланды. Ал тауар өткізуге келер болсақ, қазіргі күні қалада азық-түліктің мол қоры бар. Қыс қандай ауырлық әкелсе де тапшылық сезілмеуі тиіс. Әлеуметтік маңызға ие деп саналатын 9 өнімнің түрі бойынша арнаулы сауда орындары қызмет көрсететін болады, — дейді қалалық кәсіпкерлік бөлімінің сауда секторының меңгерушісі Әмина Сыздықпаева.
Биыл семейліктер үшін әлеуметтік тұрақтандыру қорынан бөлінетін тауарлар ішінде 700 тонна қант, 400 тонна күріш, 54 тонна қарақұмық, 1000 литр өсімдік майы, 2200 тонна картоп, 450 тонна сәбіз, 700 тонна қырыққабат, 150 тонна қызылша бар. Көкөністердің қордан босатылатын бағасы 55 теңге. Ал дүкен сөресіне жеткізілген картоп пен көкөніс түрлері 61 теңгеден саудаланбақ.
Өткен жылғыдан бір ерекшелік — биылғы тауарлар қатарынан Белорусь және еліміздің өзге аймақтарынан әкелінетін ет өнімі алынып тасталды. Жалпы, әлеуметтік қор арқылы халықты арзан бағадағы өнімдермен қамтамасыз етудегі басты мақсат – өңірдегі баға тұрақтылығын сақтау. Бұл баға маусымдық кезең бойынша, мамыр айына дейін сақталатын болады.
Бұл тарапта әзірге бір ғана мәселе туындап тұр. Қала жұртшылығы әлеуметтік дүкендердің мекенжайларын, сатылатын тауар түрлерін біле бермейді. Сол себепті алдағы уақытта мұндай сауда нысандарының мекені мен өнімдер бағасы қалалықтарға жергілікті БАҚ арқылы хабарланбақ.
Сонымен қатар, тұрақтандыру қорынан босатылатын азықтық өнімдері әр демалыс күні ұйымдастырылатын жәрмеңкеге де шығарылмақ. Мұның өзі қалалықтар үшін қысқы мезгілді азық-түлік тапшылығынсыз, ауыл шаруашылық өнімдерін арзан бағада тұтынуға жол ашары анық.
Қазіргі күні қалалық әкімдік жанынан құрылған арнайы штаб қала дүкендері мен базарларындағы азық-түлік өнімдерінің бағасын тұрақты қадағалауда ұстап отыр. Саудагерлердің бағаны негізсіз көтеріп, тауар бағасының шарықтап кетуіне жол берілмейді. Ол мақсатта қазіргі күні қаламызда арнайы комиссия жұмыс істеуде. Өңірдегі баға тұрақтылығын сақтау мәселесі қала әкімі Айбек Кәрімовтің де назарында тұр.
Қуаныш ЖОЛЫМБЕТ,
«Семей таңы»