Мен, 40 жылдан артық жас ұрпаққа білім берген қарт ұстазбын. Осы жылдар ішінде барша ұстаздар тәрізді білім саласының маманы, мұғалім ретінде білім мен тәрбиенің қатар берілуін басты мақсат етіп ұстандым. Білім — сапалы, тәрбие- саналы болсын деген ұстаныммен еңбек еттік. Ел өміріндегі саяси оқиғалардан сырт қалмай, әр кез құлағымыз түрік жүретін әдетпен Елбасының жыл сайынғы Жолдауын асыға тосамын, әрі ынта қойып тыңдаймын. Биылғы 17 қаңтардағы Жолдауды да баса маңыз бере тыңдап, газеттерден оқып шықтым. Жоғарыда айтқанымдай, ұстаз ретінде маған ерекше ой салған ұлттық идеология мәселесі болды. Президентіміздің «Мен қоғамда «Қазақ елінің ұлттық идеологиясы қандай болуы керек?» деген сауалдың жиі талқыға түсетінін көріп жүрмін. Біз үшін болашағымызға бағдар беретін, ұлтты ұйыстырып, ұлы мақсаттарға жетелейтін идея бар. Ол- Мәңгілік Ел идеясы» деген жүректерде мақтаныш сезімін оятып, ел болудың, ұлт болып ұйысудың ұлы бағдарын айқындаған сөздері болды. Қашанда барша халықты береке мен бірлікке, ынтымақ пен татулыққа үндейтін Ұлт көшбасшысы Отанымыздағы тыныштықты, тәуелсіздігімізді тұғырлы ету үшін ішкі тұрақтылығымызды сақтай білуге шақырады. Алауыздықтан ауыздары күйген талай елдің болашағының бұлдыр болғаны белгілі. Ал, бүгінде Қазақстанымыз бағыт-бағдары айқын, ұзақ мерзімге белгілеген стратегиясы бар тұрақты елміз. Осы тұрақтылығымыз “Мәңгілік Ел” болу жолында баянды бола берсін дейміз. Келешегіміздің кемел болуы бүгінгі жастарымызға тікелей байланысты. Ал, жастарымыздың бойында Отансүйгіштік қасиеттің болуы- басты құндылық. Өйткені, Елбасы белгілеген ұзақ мерзімді Стратегия- жастар үшін. Ол жайлы Нұрсұлтан Әбішұлы Жол-дауда «Әсіресе, жастарымызға айтамын, бұл Стратегия- сіздерге арналған » деп атап өтті.
Сөзімнің соңында “Мәңгілік Ел” идеологиясымен қуаттанған жастарымыз барша қазақстандықтармен бірге жасампаздық жолында ертеңге деген сеніммен алға баса берсін. Біз тәрізді ардагер-ұстаздар жастардан білген ақыл -кеңесімізді аямайық. Болашақты баршамыз болып бірге жасайық!
Қайролла ҚАЖЫБАЕВ,
ардагер ұстаз,{jcomments on}
