Сәрсенбі күні Семейге кезекті жұмыс сапарымен келген Шығыс Қазақстан облысының әкімі Бердібек Сапарбаев шаһардағы бірнеше әлеуметтік нысандарды аралап,атқарылып жатқан жұмыстармен танысты.
Елбасы Нұрсұлтан Назарбаевтың тапсырмасына сәйкес, ШҚО-ның барлық қалалары мен аудандарында мүмкіндігі шектеулі жандарға көмек көрсету жұмыстары жүйелі түрде жүргізілуде. Ал, Семейге жұмыс сапарымен келген аймақ басшысы ең алдымен қаладағы арнайы әлеуметтік қызмет көрсету орталығына ат басын бұрды. Орталықтағы бірнеше бөлімді аралап, қызметкерлерімен тілдесті. Мекеме басшысы Рымжан Тынысованың сөзіне сүйенсек, оңалту орталығында бүгінгі таңда 400 балаға қызмет көрсетілуде. Соның ішінде мүмкіндігі шектеулі 38 балаға тұрақты түрде, ал, Жаңасемей ауданына қарасты ауылдардағы 21 балаға арнайы әлеуметтік көмек көрсетілетін көрінеді. Мұнда есепте тұрған жүйке ауруларына шалдыққан балалар да бар. Ал, орталықта мүмкіндігі шектеулі жандарға әлеуметтік-тұрмыстық, педагогикалық, психологиялық, медициналық, құқықтық, экономикалық және мәдени тұрғыдан қызмет көрсету үшін барлық жағдайлар жасалған. Мысалы, логопед, психолог, дәрігер мамандар жұмыспен қамтылып, балалар үшін ойын ойнайтын, қол өнер жұ-мыстарымен айналысатын арнайы бөлмелер де қарастырылған.
{jcomments on}- Өкінішке орай, мекемеде орын саны шектеулі. Егер спорт залы мен мәжіліс залы бар үлкен ғимарат салынса, біздегі емделушілер саны одан әрі көбейе түсер еді. Өйткені, ниет білдірушілер саны аз емес. Сонымен қатар, мүмкіндігі шектеулі балаларын үй- лерінде күтіп, қарап отырған ата-аналарға да жұмысқа шығуға мүмкіндік туар еді, — дейді Р.Тынысова.
Шынымен де ондағы білікті мамандардың бірнеше жыл бойы күнделікті жүйелі түрде жүргізіп келе жатқан оңалту жұмыстары оңды нәтижесін беруде. Өткен жылы ондағы бірнеше баланың денсаулығы қалыпқа келген. Мысалы, үш бүлдіршін балабақшаға, тағы үш бала мамандандырылған мектеп-интернаттарға жіберілген. Ал, екі бала әдеттегі жалпы білім беретін мектепте, үшеуі колледжде, тағы біреуі жоғары оқу орнында білім алуда. Сонымен қатар, үш бала үй тәрбиесінде болса, 17 баланың үйіне мамандар арнайы барып оқытады екен. Ал, үш тәрбиеленушіге мүгедектік топқа шығуына оңалту орталығы көмек көрсеткен. Атқа-рылған бұл жұмыстар бүкіл ұжымның еселі еңбектерінің ақталып жатқаны дейді мамандар.
— Арнайы әлеуметтік қызмет көрсету орталығы мекемесінің тарлық етіп жүргенінен хабардармын. Облыстық жұмыспен қамту және құрылыс үйлестіру басқармасына мүмкіндігі шектеулі жандарға арналған оңалту орталықтарына жаңа ғимараттардың жобалық-сметалық құжаттарын жасауға кірісуді тапсыратын боламын. Егер биыл құжаттары дайын болса, келер жылы Семейде үлкен ғимарат салынатын болады, — деген Бердібек Мәшбекұлы облыста мүмкіндігі шектеулі жандар осы уақытқа дейін де назардан тыс болмағанын, ал, Елбасының биылғы Жолдауынан кейін бұл салаға бұрынғыдан да көбірек назар аударылатынын жеткізді.
Бұдан кейін облыс әкімі Бердібек Сапарбаев пен қала басшысы Айбек Кәрімов бастаған топ Б.Момышұлы көшесі мен Қозыбағаров көшесінде салынып жатқан бес қабатты үйлерге барды. Көпқабатты екі үйдің де құрылыс жұмыстары қарқынды түрде жүргізіліп жатқаны байқалып тұр. Аймақ басшысы алдымен Б.Момышұлы көшесіндегі құрылыс алаңына аялдады. Сыртынан қарасаң, көрер көзді сүйсіндіретін жаңа үйдің ішкі әрлеу жұмыстары қалған екен. Облыс әкімі үйдің бірнеше қабатын аралап, кең әрі ыңғайлы бөлмелерді көріп шықты. Мамандардың айтуынша, пәтерлерді әрлеу жұ-мыстары жасалмаған күйінде де сатып алуға болады. Дәл осы күйінде ондағы 1 шаршы метрдің бағасы 1000 АҚШ долларын құрайды екен. Бұл пәтер алушыларға тиімді екенін айтады мамандар.
Одан кейін Қозыбағаров көшесіндегі үйдің де құрылыс жұмыстары облыс әкімінің көңілінен шықты. Жеке кәсіпкердің қаржысына салынып жатқан көппәтерлі үйдің де ішкі жұмыстары қалған. Ал, бұл сәулетті үйдің ауласына 7 гараж да салынған. Аймақ басшысын атқарып жатқан жұмыстарынан хабардар еткен «Алтын ұя» ЖШС-нің директоры Б.Қабдрахманов пәтер бағасы қалалықтардың қалтасына тиімді болатынын айтады.
— Семейде коммерциялық бағыттағы тұрғынүйлердің салынуы өте қуантарлық жағдай. Өкінішке орай, мұндай құрылыстар облыс орталығының өзінде жеткіліксіз. Тек қана мемлекеттік бағдарламалар бағытында құрылыс салудың қажеті жоқ. Қала басшылығы кәсіпкерлермен толыққанды байланыс орнатып, осындай жұмыс жасауы құптарлық іс, — деп атап өткен Б.Сапарбаев, — тұрғынүйдің бағасы өзін-өзін ақтайды деп ойлаймын. Міне, 10 пәтердің 8-і сатылып кеткен. Ал, бірінші барған тұрғынүйдегі 30 пәтердің 20-сы сатылған. Демек, сатып алуға ниеттілер бар. Сондықтан, жекеменшік фирмалар мұндай құрылыстарды жүргізіп, тағы да ғимараттар салуға дайын. Негізі мемлекеттік бағдарламалар аясында салынатын барлық тұрғынүйлерді жекеменшік фирмаларға беріп, оны мемлекеттен бөлінетін қаржыға сатып алу қағидаларын ұстанатын боламыз, — деп сөзін қорытты.
Нұрдәулет КӘКІШЕВ,
«Семей таңы»
