Бұл күнде атқарушы билік жұмысының ашықтығын айшықтайтын әкімдердің есептік кездесулері өтуде. Жарма ауданының әкімі Нұрлан Сыдықовтың аудан тұрғындары алдындағы есеп беру жиыны Шалабай, Әуезов, Бірлікшіл ауылдық округтерінде өтті. Аудан әкімінің есептік кездесуінде өткен жылғы өңірдің әлеуметтік – экономикалық жағдайын арттыру бағытында атқарылған істер сарапқа салынып, ағымдағы жылға жоспарланған жұмыстар жайы халыққа жан – жақты түсіндірілді.
Нұрлан Бәтташұлының Шалабай ауылының тұрғындарымен жүздесуінде алдымен ауылдық округ әкімі Жанар Есембаева Қой жылында атқарылған жұмыстарды баяндады. Мыңнан астам тұрғыны бар тірек ауылдың әлеуеті жыл санап артып келеді. Асыл тұқымды ірі қара малын өсіруші «Шалабай» ЖШС ауыл әкімдігімен әріптестік орнатқан. Бұл ретте «Бақыршық кен өндіру кәсіпорны» ЖШС–нің де әлеуметтік жауапкершілігі жоғары. Алдағы көктемде «Айм Лаб» ЖШС шунгит өндіруі цехы толыққанды іске қосылса, қосымша ауылдың 15 азаматы тұрақты жұмыспен қамтылады деп күтілуде. Кездесуде жергілікті дәрігерлік амбулатория ғимаратын күрделі жөндеу, су жүйесін тарту жұмыстары кезінде ауылдағы 16 үйдің жобаға енбей қалуы жайында мәселелер көтерілді. Ауыл тұрғындары аталған 16 шаңыраққа су тартылса деген ұсыныстарын жеткізді. Бұл мәселені Нұрлан Бәтташұлы өз назарына алып, шешу жолдарын қарастыратынын жеткізді. Ал ауыл амбулаториясының ахуалы мен көлік бөлу мәселесін Шар қалалық ауруханасының бас дәрігері Марат Кабдрахмановқа ШҚО Денсаулық сақтау басқармасымен бірлесіп шешуге тапсырма жүктеді.
Тұрғындар алдында ауданның өткен жылғы әлеуметтік – экономикалық дамуына жан – жақты тоқталған Нұрлан Бәтташұлы әсіресе өнеркәсіп саласына ерекше тоқталды.
— Ауданның негізгі экономикалық бағыты ауыл шаруашылығы болғанмен, соңғы 3 жылда өнеркәсіп саласында өнім өндіру көлемі 58 пайызға артты. Жыл көлемінде өнеркәсіп кәсіпорындары жиыны 10 610 млн. теңгенің өнімін өндіріп, 452,0 млн. теңгенің салығын төледі. Аудан халқының 5 пайызы (немесе 2 200 адам) осы салада еңбек етуде. Әлемде болып жатқан экономикалық дағдарыс ауданымыздың өнеркәсіп өнімінің төмендеуіне әсер етпей қоймады. Тапсырыстың азаюына байланысты «Казахцемент», «АС Горняк» ЖШС-нің 2014 жылмен салыстырғанда өнім өндіру көлемі кеміп отыр. Жалпы, Жарма ауданы бойынша 20 кен өндіру кәсіпорны тіркелген. Олардың ішіндегі ең ірісі «Бақыршық тау-кен өндіру кәсіпорны» ЖШС-не жаңа басшылықтың келуімен жылдар бойы тоқтап тұрған ірі өндіріс орны жанданып келеді. 2018 жылдың екінші жарты жылдығында іске қосылуы жоспарланған жоба өз кезеңімен жүзеге асырылуда. Зауыттың инфрақұрылымын дайындау жұмыстарына 2015 жылы 1,1 млрд. теңгеге жуық инвестиция тартылды. Бірнеше жыл тоқтап тұрған «Тяньши» серіктестігі өнім өткізуге тапсырыс алып, жұмысын бастады. Бөке кенішінде «Шұғыла Голд» және «Боко» ЖШС-тері шағын алтын өндіру зауыттарын ашу үшін бүгінгі күні геологиялық барлау жұмыстарын жүргізуде. Үдемелі индустриялық — инновациялық даму бағдарламасы аясында іске асырылуы жоспарланған «ВЭУ Шар» ЖШС-нің қуаттылығы 37,5 МВт болатын жел электр станциясының құрылысы облыстық үйлестіру кеңесінде қаралуда,- деп атап өтті аудан әкімі.
Ал Әуезов кентіндегі кездесуде аудан әкіміне бірқатар сауалдар жолданды. Мәселен, құс өсірумен айналысатын жеке кәсіпкер Михайл Миллер соңғы уақытта сұраныстың артуына байланысты жұмыс аясын кеңейтпек ойы бар екенін жеткізді. Бұл ретте аудандық әкімдік тарапынан жеңілдетілген несие алуға қолдау көрсетуі жайын сұрады. Кәсіп иесінің іскерлігін жоғары бағалаған аудан әкімі нақты әрі тиімді жобалар болса, қашанда қолдауға әзір екенін атап өтті. Екі жарым мыңнан аса тұрғыны бар кентте жанармай құю бекетінің болмауы да біраз қиындықтар туғызып отырған көрінеді. Бұл мәселемен жақсы таныс екенін айтқан аудан әкімі, мемлекет есебінен мұндай нысан салынбайтындықтан, оны шешу жолдары қарастырылып жатқанынан хабардар етті.
Кезекті есептік кездесу бірлігі бекем Бірлікшіл ауылында жалғасты. Ауыл әкімі Рымбек Нұртаза өз есебінде ауылдағы ауыз су мәселесіне тоқталып, бұрынғы су алатын орынға су ұңғымасы орнатылса деген ауыл тұрғындарының өтінішін жеткізді. Аталмыш мәселені назарына алған Нұрлан Бәтташұлы жергілікті білім ошағының спорт залы апатты жағдайда екенін айта келе, жуық арада жөндеу жұмыстарын үйлестіруді тапсырды.
Жалпы, барлық кездесулерде Нұрлан Бәтташұлы ауылдарды өркендету, көркейту, әлеуетін арттыру мақсатында ауыл тұрғындарын ашық пікір алмасуға шақырды.
Мейірхан ОСПАНБАЕВ,
«Семей таңы»
