Апта басында Қазақ инновациялық гуманитарлық заң университетіндегі «Қазақстан жолы» тәрбие — білім орталығында аталмыш білім ордасы мен қаладағы Жастар орталығы, жастар ұйымдары және «Жас Отан» жастар қанаты ұжымдарының ұйымдастыруымен Елбасының биылғы жылғы халыққа Жолдауын талқылау жиыны өтті.
Қалалық Жастар орталығының директоры Қайсар Еркінбаевтің жетекшілігімен өткен жиынға ҚазИГЗУ ректоры Шырын Құрман-баева, қалалық ішкі саясат бөлімі басшысының орынбасары Айдар Садырбаев пен ҚазИГЗУ-дегі «Қазақстан жолы» тәрбие-білім орталығының директоры Аман Рахметуллин және білім ошағының оқытушылары, тарихшылар мен қаланың белсенді жастары қа-тысты. Жиында алғашқы болып сөз алған Шырын Құрманбаева Елбасы Жолдауының жастарға және білім беру саласына қатысты айтқан сөздеріне тоқталды.
{jcomments on}- «Білім беру саласында әлемдік стандарттарға сәйкес жүйелену керек» деді Елбасы. Сонымен қатар, мүмкіндігі шектеулі жастарға көмек қолын созуды айтты. Біздің университетте де бірнеше мүмкіндігі шектеулі жастар білім алуда. Оларға мен бірнеше жылдан бері арнайы ректорлық грант беріп отырмын, — деген Шырын Асылханқызы жас мамандарға мүмкіндігі шектеулі жастарды қолдау керектігін атап өтті. Жастарға қатысты талай тағылымды сөздер айтқан білім ордасының басшысы бүгінде университет түлектерімен, студенттерімен, жалпы, барлық шәкірттерімен мақтанатынын жеткізді.
Одан кейін сөз алған «Қазақстан жолы» тәрбие-білім орталығының директоры Аман Рахметуллин:
— 2050 стратегиясы жайлы алғаш естіген уақытта оны басқаша қабылдаған, «бізге алдағы 50 жыл емес, қазіргі уақытқа жоспар құру жеткілікті» деген адамдар да болды. Әрине, бұл саяси сауатсыздық. Болашаққа бағдар жасау ол келешек ұрпақтың қамы. Ал, 2050 жылдары еліміз әлемнің дамыған 30 елінің қатарына қосылуы үшін бүгінгі жастар – сіздердің еселі еңбек етулеріңіз керек. Ол үшін барлық жағдайлар жасалу үстінде. Жолдауда білім-ғылым саласын көтеру керектігі басты назарда болды, — деді.
Ал, сөзінің басында ҚазИГЗУ-де білім алғанына, ұстаздарымен қатар отырғанын шәкірттік бақыт деп санайтынын айтып өткен аталмыш білім ошағының түлегі, қалалық ішкі саясат бөлімі басшысының орынбасары Айдар Садырбаев:
— 2050 стратегиясын жүзеге асыру жайында Елбасы биылғы Жолдауында кеңінен тоқталды. Егер мән беріп қарасақ, Елбасының тапсырмаларының түйіні бүгінгі жастарға жүктеледі. 2050 жылы әлемнің дамыған 30 елінің қатарына кіру бақытын да көретін, жастар, сіздер. Болашаққа жасалған жоспар да бар, мақсат та айқын. Енді тек еңбек ету керек. Сондықтан, келешекте жастарымыз Жолдауда белгіленген міндеттерді жүзеге асыруға белсенділік танытулары тиіс, — деп атап өтті.
Сонымен қатар, жиында Жолдауда көрсетілген қазақ тілі туралы да ойлар ортаға салынды. Ал, қала жастарының атынан «Пікір сайыс» бірлестігі қоғамдық қорының атқарушы директоры Жал-ғас Оралбаев өзі сияқты өрендердің өрісі кеңейе түсуіне Жолдаудың жол ашып, биік белестерді бағындыруда жастарға ерекше серпін бергенін айтты. Жиынға қатысушылар «Мәңгілік Ел» идеологиясын жүзеге асыруда бар күш-жігерлерімен жұмыс істейтіндіктерін жеткізді.
Нұрдәулет КӘКІШЕВ,
«Семей таңы»
