Қазақстан Республикасының Президенті Н.Ә.Назарбаев «Қазақстан жаңа жаһандық нақты ахуалда: өсім, реформалар, даму» атты Жолдауында техникалық және кәсіптік білім беру жүйесін жаңғыртуға ерекше тоқталды. Әлбетте, техникалық мамандықтарға басымдық беріп, дуалдық оқыту жүйесін енгізу — уақыт талабы. Бұл білікті кадрлар әзірлеп, олардың бәсекеге қабілеттілігін арттыруға ықпал етеді. Осы ретте Семей қалалық кәсіпкерлер палатасы, металл құрылымдарды жасаумен шұғылданатын «Металлист» зауыты және Құрылыс колледжі ынтымақтастық туралы үш жақты меморандумға қол қойды.
Зауыт — машина құрастыру саласы мен металл өңдеуде әлеуеті зор кәсіпорындардың бірі. Бүгінде түрлі жабдықтар мен құрылысқа қажетті металл құрылымдарын шығарумен айналысады. Өндіріс қуаттылығын еселеп, еңбек өнімділігін арттыру мақсатында кәсіпорын жұмысқа жас мамандарды тартуға басымдық беріп отыр. Яғни, меморандумға сәйкес, колледж студенттері өндірістік тәжірибеден өтіп, кәсіби деңгейде шыңдала түспек. Бұған қоса зауыт басшылығы үздіктерін жұмыспен қамтуды да көздеп отыр.
— Меморандум бізге жас мамандарды даярлауда үлкен мүмкіндік береді. Студент оқу орнында теориялық білім ала жүріп зауытта тәжірибесін шыңдайды. Бүгінгі таңда біздегі жұмысшылардың көбінің еңбек өтілі 20 жылдан асады. Демек, олардың жастарға берері мол. Сондықтан жас мамандар даярлауға басымдық беріп отырмыз,- дейді зауыттың бас директоры Айдос Серікқалиұлы.
Ал кәсіпорын мен оқу орны арасындағы қарым-қатынасты реттеуге кәсіпкерлік палатасы ықпал етіп отыр. Білікті маман даярлауда дуалдық оқытудың маңызы зор. Бұл үрдіс қазір әлемнің озық елдерінде жаппай қолданылады. Қалалық кәсіпкерлер палатасының директоры Ардақ Әділжановтың айтуынша, теориялық біліммен қатар, зауыттың тыныс-тіршілігін өз көзімен көріп барып еңбекке араласқан жастан ғана білікті маман шығады.
— Қала кәсіпорындары ынтымақтастық құру туралы ұсыныстарымызды жақсы қабылдауда. Бұл, әрине, қуантарлық жағдай. Бүгінгі таңда жүзеге асырылған келісімшарттар көп. Олардың арасында 3 жақты, 4 жақты меморандумдар бар. Қазір олардың саны 100-ден асады,- дейді Ардақ Әділжанов.
Дуалдық оқыту жүйесінде студент білім алу үрдісінің үштен екі бөлігін өндірісте өткізеді. Қалған уақытын теориялық білім алуға жұмсайды. Меморандумға сәйкес, зауыт басшылығы колледждің инженерлік-педагогикалық құрамы мен өндірістік оқыту шеберлердің біліктілігін арттыруда да қолдау көрсетпек.
«СТ — ақпарат»
