Таяуда Үржарда аудан әкімі Серік Зинабекұлы Зайнулдиннің қатысуымен аудан активінің жиыны өтіп, күн тәртібінде бірқатар мәселелер қаралды. Қазіргі таңда, байтақ еліміз тәрізді, Үржар өңірін де айтулы шаралар күтіп тұр. Мұндайда атқарушы биліктің білікті қызметі мен жергілікті мекемелер мен ұйымдардың ынтымақты қызметі аса маңызды.
Мемлекеттік мүдде жолында елдігімізді танытар шараларды абыроймен өткізу — баршаға ортақ міндет. Соның ішінде 20 наурыз күні өтетін ҚР Парламенті Мәжілісі мен деңгейлік мәслихаттар сайлауына даярлық жұмыстары кең көлемде пысықтауды қажет етеді. Аудан әкімі Серік Зинабекұлы бұл ретте сайлауалды шараларды тиімді түрде жүргізуді тиісті адамдарға жүктеп, бірқатар маңызды тапсырмалар берді.
Сонымен қатар аудан басшысы Елбасы Нұрсұлтан Назарбаевтың бес институционалдық реформасын жүзеге асыруға бағытталған «100 нақты қадам» Ұлт жоспары мен «Қазақстан жаңа жаһандық нақты ахуалда: Өсім. Реформалар. Даму» атты Жолдауы басымдықтарын тілге тиек етіп, Мемлекет басшысының сындарлы саясатын Үржар өңірінде нақты іспен орындап, нәтижеге жету жолында береке-бірлік таныту қажеттігі жайлы кеңінен сөз етті.
Жиын барысында бұдан өзге де ел өмірі үшін маңызды салалар жайлы әңгіме қозғалды. Атап айтсақ, аудан басшысы Серік Зинабекұлы өңірдегі су, жарық, телефон, жол байланыстарын тұрақты түрде бақылап, нан өнімдері мен дәрі-дәрмектің бағасын қалыпты межеде ұстау күн тәртібіндегі міндет екендігін атап өтті. Бұл шараларды жүргізуді тиісті орындарға, құзырлы мекемелер басшыларына тапсыра келе, білім ордалары және денсаулық сақтау мекемелерінің құрылыстарын жүргізу жұмыстарын да атап өтті.
— Биылғы жыл егін түсімі мол, тоқшылық жылы болады. Алдағы күнге оптимистік болжам бар. Көктемгі егістік науқанына керекті техникаларды дайындап, ауданның әлеуметтік-экономикалық жағдайын көтеріп, өңірді одан әрі көркейтіп-абаттандыру жұмыстарына ұйымшылдықпен бел шешіп кірісу керек, — деді Серік Зайнулдин. — Алда тұрған міндеттер мен мақсаттар көп. Солардың барлығын бір жағадан бас, бір жеңнен қол шығарып әрі жауапкершілікпен атқарып, береке-бірлігіміздің нәтижесінде алдыңғы қатардан көрініп, облыс басшысы қойып отырған тапсырмаларды тыңғылықты орындау қажет.
Осылай деп атап өткен Серік Зинабекұлы жиынға қатысушы барша мемлекеттік қызметкерлерді өңірді бірлесіп өркендету жолында жұмыла қызмет етуге шақырды.
Бауыржан ЖАҚЫП,
«Семей таңы»
