Семей қалалық жолаушылар көлігі және автомобиль жолдары бөлімі басшысының міндетін атқарушы Нұрлан Серғазинов БАҚ өкілдері алдында биылғы жылғы жол күтіміне байланысты түсінік беріп өтті.
Айта кетсек, 6 сәуір күні «Нұр Отан» партиясы Семей қалалық филиалында өткен қоғамдық кеңестің кезекті отырысы барысында Нұрлан Серғазинов аспалы көпірдегі жол жөндеу ісін сынға алып өткен болатын. Бұл жолғы басқосуда бөлім басшысының міндетін атқарушы өз сөзіне түзету енгізбек ниетте екен.
— Аспалы көпірдегі жұмыстарға байланысты білдірген өз пікірімде технологиялық жұмыстарды ескермегенімді атап өткім келеді. «ОблШығысЖол» МКК мекемесі жүргізіп жатқан шаралар, бүгінгі күн тұрғысынан алып қарастырсақ, барлық талапқа сай келеді. Яғни, асфальт құю ресейлік технология негізінде жүзеге асады. Жол жабынын жөндеуде температуралық режім сақталады. Сол себептен де әріптестерімнің алдында ғафу өтінемін. Қорыта айтсақ, аталмыш жаңа технология бойынша жұмыс қаламызда алдағы уақытта да жалғаса беретін болады және біздің әріптестігімізге нұқсан келтірмейді,- деді өз сөзінде Нұрлан Серғазинов.
Бөлім басшысының міндетін атқарушы суық төсем жұмыстарының түрлі параметрлер бойынша жүргізілетінін жеткізіп өтті. Бұл ретте арнайы мамандармен кеңес өткізген соң аспалы көпірдегі жол жөндеу жұмыстарының ойдағыдай жүргізіліп жатқанына көз жеткізіпті. Қазіргі таңда мұндағы жұмыстар кезең-кезең бойынша жүзеге асуда. Қазіргі мезгілде шамалы кідіріп тұр. Мекеме қызметкерлерін шақырып алдағы уақытта аталмыш технология тәртібімен танысуды көздеуде. Себебі мұндай әдіс арқылы жөнделген асфальт аязға төзімді келеді. Сонымен қатар шығыны да аса көп емес. Яғни, алдағы уақытта қаламыздың өзге жолдарында да осы әдісті қолдануға негіз бар.
— Бұл технология, негізінен, Ресейдің Новосібір сынды табиғаты аса қатаң аймақтарында қолданылады. Яғни тәжірибеден өткізілген технология,- деді өз пікірін білдірген Нұрлан Серғазинов.
Қазіргі таңда аталмыш мекеме облыстық қаржыландыру негізінде аспалы көпірде ағымдағы жұмыстар жүргізуде. Жалпы, ағымдағы жол жөндеуге биыл 265 млн. теңге бөлінген. Бұл ретте қаланың ең проблемалы көшелеріндегі жұмысты бірінші кезекте қолға алу жоспарлануда. Сонымен қатар жылу беру маусымы аяқталуға таяу. Алайда кейбір мекемелерге, яғни балабақшалар мен мектептерге, 1 мамырға дейін жылу беріле бермек.
Н.Серғазинов Орталық алаңдағы субұрқақтың жайына да тоқталып, мамыр айының 1-і күні сынау мақсатында іске қосылатын болатынын атап өтті. Қазіргі таңда субұрқақтың жұмыстары аяқталуға таяу.
Қ.ӘЛІМБЕК,
Семей қаласы.
