Саяжайлардың санитарлық тазалығы депутаттардың назарында. Қала тазалығы жайында мәселе көтергенде шаһардың шеткі аймақтарындағы саяжай массивтерін айналып өте алмаймыз. Осы ретте Семей қалалық мәслихатының депутаттары Айнұр Арғынбекова, Сергей Родионов және ШҚО мәслихатының депутаты Альбина Ахметова өткен аптада Восточный, Водный және Восход кенттерінің тұрғындарымен кездесу өткізді.
Саяжай кооперативтерінің тұр-ғындарымен өткен кездесуге, депутаттардан өзге, табиғатты қорғау полициясы, қалалық тұтынушылардың құқықтарын қорғау басқармасының мамандары, ШҚ АЭК сынды құзырлы орган өкілдері де қатысты. Басқосуда, негізінен, жылдар бойы қайталанып келе жатқан тазалық мәселесі көтерілді. Жиында алғаш болып сөз алған саяжай кооперативтерінің төрағалары бүгінде саяжайлардағы тазалықтың өз деңгейінде емес екенін, мұның басты себептерін кейбір саяжай тұрғындарының тазалыққа немқұрайлы қарайтынымен байланыстырады. Осы ретте сөз алған «Садовник» қоғамдық ұйымының төрайымы Татьяна Говорова ұйымға қарасты «Восточный правый» саяжайында тоғыз мыңнан астам халық тұратынын, алайда тұрақты тұрып жатқандардың көбі тұрғылықты халық, яғни қала тұрғындары саналатынын атап өтті. Оның айтуынша, қысы — жазы тұрып жатқандар, тазалық үшін, қоқыс шығарумен айналысатын мекемемен келісімшартқа отырулары керек. Алайда тұрғындар көбіне келісімшарт жасамай, тұрмыс қалдықтарын кез келген жерге тастап кете беретін көрінеді. Ал оның салдары қоғамдық ұйымға тиіп, жыл сайын айыппұл салынып, қоқыс шығаруға міндеттелетін көрінеді.
— Аталмыш мәселе бойынша барлық жерге хат жазып шықтым. Бізге тым болмағанда басты көшені тазартуға арнайы техника мен жұмысшылар керек. Тұрғындар қоқыс шығарумен айналысатын мекемелермен келісімшарт жасауға құлықсыз. Оның үстіне арнайы мекемелер де саяжай аумақтарына кіруге бас тартып жатады,- дейді Т.Говорова.
Басқосуда сондай-ақ аталған аудандарды ауыз сумен қамтамасыз ету, тозығы жеткен бағаналарды ауыстыру, жолдарды жөндеу сынды бірқатар мәселелер де көтерілді. Ал халық қалаулылары тазалық айлығы аясында ұйымдастырылып отырған шаралардың алдағы уақытта да жалғасатынына сендірді.
— Қазір қала тазалығына қатысты айлық шаралары басталды. Осы жұмыстарға біз де белсенділік танытып, тұрғындарды өз аумақтарын қоқыстан тазартуға шақырамыз. Тазалық әркімнің жеке гигиенасы ғана емес, ол — бүкіл қоршаған ортаның, қаланың, көшелер мен қоғамдық орындардың тазалығы. Бұл жерлердегі тазалықты сақтау – баршамыздың міндетіміз. Адамның жеке басының мәдениеті де тазалықтан тұрады. Тазалық сақтау өзімізден, үйімізден, ауламыздан басталады,- дейді С.Радионов.
А.САМАТҰЛЫ,
«Семей таңы»
