Биыл Семей қаласындағы көне сәулет туындыларының бірі өрт бақылау мұнарасының іргетасының қаланғанына 89 жыл болыпты. Осыған орай апта дүйсенбісінде семейлік өрт сөндірушілердің бастамасымен тұңғыш рет тарихи нысанның 89 жылдығы аталып өтті.
Тарихи құжаттар бойынша бұл нысан 1927 жылдың 17-ші сәуірінде қолданысқа беріліпті. Шаһардағы өрт оқиғаларының алдын алу мақсатында тұрғызылған сәулет құрылымы 30 жылдан астам уақыт қалалықтардың қауіпсіз өмір кешуіне қызмет еткен екен. Оның биіктігі 30 метрді құрайды. Мұнара жұмыс істеген жылдары оның қызметіне тек таңдаулы мамандар ғана іріктеліп алынып отырыпты. Оларға қойылған талаптар да өзгеше болған. Мәселен, кезекшілікке тұрған адам өте қырағы, төзімді, шыдамды әрі қаланың бүкіл аудандарын жақсы білуі керек болған. Сондай-ақ әр кезекші түтіннің түсіне қарап өрт жағдайының деңгейін ажырата білуге міндетті болатын. Жазғы уақытта кезекшілер екі сағат сайын, ал қысқы мезгілде әр сағат сайын ауысып отырған екен.
— Мұндай өрт бақылау мұнарасы Қазақстан бойынша, Семей шаһарынан бөлек, Орал қаласында да бар. Алайда олардың мұнарасы уақытқа шыдас бермегендіктен, оған жөндеу жұмыстары жүргізіліпті. Ал біздің мұнарамыздың алғашқы сәулет үлгісі қаз-қалпында сақталған. Оған шығу үшін 100 баспалдақпен көтерілуге тура келеді. Осы датаны атап өту идеясын қаладағы №2 өртке қарсы қызмет жасағының басшысы Асхат Жаймұхамедов көтерген болатын. Біздің ғимаратымыз сәулет өнеріне және тарихи ескерткіштер санатына жататындықтан, мемлекеттің ерекше назарына алынған. Келер жылы өрт бақылау мұнарасының 90 жылдығын атап өтуді көздеп отырмыз,- дейді Семей қаласындағы өртке қарсы қызмет мұражайының меңгерушісі Наталья Рыкова.
Өрт бақылау мұнарасының туған күніне орай ұйымдастырылған салтанатты жиынға қаладағы №2 өртке қарсы қызмет жасағының аға офицерлік құрамы, жасақ қызметкерлері, ТЖБ-ның өкілдері және өртке қарсы қызмет саласының ардагерлері қатысты. Тағы бір айта кетерлігі, өткен жылы әр кезеңде мұнарада қызмет еткен сарбаздар құрметіне нысанның басына ауысымсыз кезекшілікке «өрт сөндіруші» манекен қойылған болатын. Қыс бойы №2 жасақ бөлімшелерінде манекен сарбазға есім қоюға байланысты байқау да жүргізіліпті. Нәтижесінде оған «Сөндірбек» деген есім бұйырған екен. «Бүгінде Сөндірбек қаланың өрт қауіпсіздгін сақтауда ауысымсыз кезекшілігін абыроймен атқарып келеді»,- деп әзілдейді №2 өртке қарсы қызмет жасағының қызметкерлері.
Ж.СҮЛЕЙМЕН, «Семей таңы»
