Жат ағымдардың арбауына түскен тағдырлар жайын өзек еткен «Шырмауық» қойылымын өткен сенбі күні Шығыс Қазақстан облыстық Жамбыл атындағы драма театрдың қазақ труппасы Абай атындағы драма театрында сахналады.
Бұл облыстық мәдениет, мұрағаттар және құжаттама басқармасының тапсырмасы бойынша, сондай-ақ облыстық дін істері басқармасының басшылығының қолдауымен сахналанған туынды. Сахналық қойылым бір отбасының өмірі арқылы қоғамдағы діни ахуалды суреттейді. Қойылымда шетелге музыкалық білім алуға кеткен ұлын зарыға күткен ата-ана балалары келе жатыр деген хабарды естісімен туған-туыстарын жиып, дастарқан жайып, ұлдарын қарсы алады. Бірақ жат ағымның жетегінде кеткен ұлдары жолдастарымен келіп олардың қуанышын су сепкендей басады. Үлкендердің айтқан кеңестеріне құлақ салмаған ұлдарының жат ағымға бой ұрғанына көз жеткізген әке оны полицияның қолына тапсырады. Ал ішкі істер саласының қызметкерлері арнайы дін өкілін шақырып, адасқан жанның таңдаған жолының ақ-қарасын ажыратып береді. Жастарды шырмауықтай шырмаған осы көріністі театр актерлері нанымды жеткізді. Басты рөлдердегі адасқан баланың бейнесін сомдаған Жасұлан Серкетаев та, ата-ананың рөліндегі Қанат Ниязбеков пен Майра Арғынбекованың өнерлері де көрермен тарапынан жоғары бағасын алды. Осы орайда режиссерге дін жөнінен кеңес берген исламтанушы Қуат Қабдолданың еңбегін айта кеткен жөн. Өйткені қойылымда дәстүрлі дін мен жат ағымның аражігін тайға таңба басқандай етіп ажыратып берген. «Шырмауық» қойылымының сценарийін белгілі актер, танымал режиссер, драматург Бек Рамазан жазған.
Мейіржан АМАНГЕЛДІ, Семей қалалық ішкі саясат бөлімінің бас маманы.
