Семейдің Балалар мен жастардың шығармашылық сарайында ағымдағы жылдан бастап елімізде білім саласына енгізілген жаңашылдықтарды түсіндіру мақсатында арнайы кездесу өтті. Алқалы басқосуға Семей қаласы әкімінің орынбасары Надежда Шарова, қалалық білім бөлімінің басшысы Наталья Фесенко, мектеп директорлары мен ұстаздар, ата – аналар қауымы қатысты.
Қазақстандағы білім беру жүйесіндегі өзгерістер, жаңашылдықтар, бастамалардың басты мақсаты аталмыш саланың әлемдік бәсекеге қабілеттілігін жоғарылату әрі экономиканың тұрақты өсімін қамтамасыз ету үшін адами капиталды дамыту болып табылады. Биыл еліміздің білім саласына арналып Елбасының Жарлығымен Қазақстан Республикасында білім беруді және ғылымды дамытудың 2016-2019 жылдарға арналған мемлекеттік бағдарламасы бекітілген еді. Бағдарламаға сәйкес, 2019 жылға дейін барлық сыныптар білім берудің жаңа сатысына кезең-кезеңмен өтеді. Ал 2019-2020 жылдары мектепалды даярлық топтары 12 жылдық мектептерде 1-ші сыныптардан бастап тәрбиеленетін болады деп көзделуде.
— Жуырда елімізде білім мен ғылымды дамытуға бағытталған 2016-2019 жылдарға арналған кешенді мемлекеттік бағдарлама қабылданды. Бұл құжат Мемлекет басшысының бес институционалдық реформасын жүзеге асыруға бағытталған «100 нақты қадам» Ұлт жоспарын іс жүзінде орындауға мүмкіндік береді. Бүгінде ұстаздар мен оқушылардың алдына қойылған талаптар қатаң. Қазіргі нарықтық уақытта біз бәсекеге қабілетті, жоғары білімді әрі білікті мамандарды дайындауымыз қажет. Ол үшін қабылданған Заңды алға тарта отырып, барлығымыз бір кісідей жұмыс атқаруымыз керек,- деді қала әкімінің орынбасары Надежда Шарова өз сөзінде.
Кездесу барысында Білім беруді дамытудың 2016-2019 жылдарға арналған мемлекеттік бағдарламасында көрсетілген бірыңғай мектеп формасы жайлы мәселе де қызу талқыға түсті. Анықталғандай, мұндай шешімді қабылдау арқылы ҚР Білім және ғылым министрлігі ең алдымен әлеуметтік әрі мүліктік теңсіздікті жоюды мақсат етіп отыр екен. Дегенмен де киімді таңдау құқығы ата-аналардың таңдауына қалдырылады. Тек оның түсі мен үлгісі қоғамдық кеңес, білім беру мекемесі және ата-аналардың жалпы жиналысының шешімімен бекітіледі. Сонымен қоса қалалық білім бөлімінің басшысы Наталья Фесенко ата-аналар қауымына қолдағы бар мектеп формасын киюге рұқсат етілетінін жеткізді. Алайда қала әкімінің орынбасары Н.Шарова, білім беру мекемелерінің басшылары белгілі бір кәсіпкердің мүддесін қорғаса, аталмыш тұлғалар қылмыстық жауапкершілікке тартылатынын қадап айтты.
— Білім беру ұжымы тек киімнің түсі мен оның үлгісіне қатысты өз ойын білдіруге құқылы. Ал мектеп формасын қай өндірушіден алса да тек ата-аналардың еркінде. Егер де білім беру мекемелерінің басшылары ата-аналарды қандай да бір кәсіпкердің тауарын сатып алуға үгіттегені туралы дәйекті ақпарат болса, қылмыстық іс қозғалады,- деді қала әкімінің орынбасары.
Жақсылық МҰРАТҚАЛИҰЛЫ, «Семей таңы»
