Түйемойнақ аралында сенбілік өткізілді. Бұл жолғы игі шараға «Жасыл ел» жастар жасағы ұйытқы болыпты. Игілікті іске сонымен қатар «Нұр Отан» партиясының қалалық филиалының өкілдері, әкімдік қызметкерлері мен қалалық мәслихат депутаттары және танымал спорт-шылар қатысты.
Сенбілік өткізуге жиналғандар ең алдымен аралдың орталығындағы аумаққа санитарлық тазалық шараларын жүргізді. Төңіректі өткен жылдан қалған ағаш жапырақтары мен көпжылдық шөптесін өсімдіктердің бұталарынан арылтып, толығымен ретке келтірді. Сонымен қатар ағаштар шірінділерін қиып, жиналған қоқыс үйінділерін аумақтан шығарды.
Бұл шараға, негізінен, колледж студенттері тартылған екен. Жасылелдіктер қатарын толықтырған жастар барынша белсенді қимылдады. Атап айтсақ, жастар таңертеңгі 9-ға шақырылғанымен, барша көпшілік таңертеңгі 8-де жиналып алып, сенбілік жұмыстарын жүргізуге қызу кірісіп кетіпті. «Жасыл ел» жастар еңбек отрядтарының Шығыс Қазақстан облысындағы штабының жетекшісі Қуаныш Қасеновтің айтуынша, аталмыш шараға жалпы саны 200-ден астам студент жастар жиналыпты. Олардың арасында өз еріктерімен келгендері көп екен. Сонымен қатар дәл осы күні сенбілікке қатысушылар 200 түп қайың ағашының көшеттерін отырғызды.
— Ендігі аралықта бұл аумақ жайқалған баққа айналады деген үмітіміз бар. Негізінен, айналаға сән беретін ағаш ретінде қайыңға таңдау жасап, Өскемен қаласынан арнайы алдырдық. Өздеріңіз куә болғандай, жастарымыз үлкен ынтамен кірісуде. Ал осынау көшеттер отырғызылған аумақты қалалық тұрғын үй — коммуналдық шаруашылығы бөлімі-нің қарамағына өткіземіз. Жаз бойғы күтіп-баптау жұмыстарын олар өз мойындарына алатын болды,- деді өз сөзінде пікір білдірген «Жасыл ел» жастар еңбек отрядтарының облыстық штабының жетекшісі Қ.Қасенов.
Аталмыш шара барысында жергілікті атқарушы билік өкілдерін бастап келген қала әкімінің орынбасары Надежда Шарова мұндай игілікті іске жұмыла кірісіп, көпшілік болып атсалысудың маңыздылығына тоқталды. Сонымен қатар әрбір қалалықты іргелі іске күш біріктіруге шақырды.
Сенбілік шарасы аясында қалалық мәслихат хатшысы Бесенбек Ақжалов бастаған халық қалаулылары да өз үлестерін қосып, арнайы аллеяға жас өскіндер отырғызды.
Жалпы, бұл күні аралда өткен сенбілікке қарапайым көпшілік те елеулі үлес қосқанын айта кету керек. Еріктілерден құралған топ шырша, қарағай көшеттерін әкеліп отырғызды.
Қуаныш ЖОЛЫМБЕТ, «Семей таңы»
