«Нұр Отан» партиясының Семей қалалық филиалында Семей қаласының әкімі Ермак Сәлімов қала тұрғындарын жеке мәселелері бойынша қоғамдық қабылдау өткізді.
Қоғамдық қабылдауға алғашқы болып кірген қала тұрғыны Юрий Захаров Өтепбаев көшесі, 44-үйдің ауласына жаңадан көп қабатты тұрғын үй құрылысын жүргізу мәселесі бойынша шағымдана келіпті. Тұрғындар атынан келіп сөз алған Юрий Захаровтың айтуынша, онсыз да тар аула аумағы қосымша көп қабатты тұрғын үй салуға келмейді екен. Бұл құрылыс нормаларының талаптарына да сай емес көрінеді.
— Үйіміздің ауласында екі дәлізді тоғыз қабатты тұрғын үй салынбақшы. Ауламыз онсыз да тар. Жөні дұрыс балалар ойын алаңы, көлік қоятын жер жоқ. Біз онсыз да тар ауламызға құрылыс жұмыстарын жүргізуге қарсымыз. Сондықтан құрылыс салуға рұқсат бермеуіңізді сұраймыз,- деді Ю.Захаров қала әкіміне.
Осы ретте Семей қаласының әкімі Ермак Бидахметұлы мәселенің жай-жапсарын анықтайтынын, құрылыс жұмыстарының барлығы заң талаптары негізінде атқарылатынын атап өтті. Шаһар басшысы сондай-ақ дербес бөлім басшыларына алдағы уақытта аула тұрғындарымен кездесу өткізіп, тұрғын үй құрылысының жобасымен таныстыруды және толыққанды түсіндіру жұмыстарын жүргізуді тапсырды.
Қабылдауға келген қала тұрғыны Амантай Солтанбаев Байсалықов, 65 «А» мекенжайында орналасқан көп қабатты тұрғын үй мәселесіне байланысты келгенін айтты. Шағымданушы тұрғын үйдің 2015 жылдың қазан айында ғана пайдалануға берілгенін, дегенмен қазір баспанада мәселенің шаш етектен екенін жеткізді. Бұл ретте қала әкімі Е.Сәлімов аталмыш тұрғын үйде бірқатар мәселелер туындауына байланысты бүгінгі күні қылмыстық істер қозғалып отырғанын жеткізді. Шаһар басшысы сондықтан мәселеге қатысы бар барлық тараптардың басын қосатын арнайы жиын өткізу керектігін тапсырды. Сондай-ақ әкім аталмыш көп қабатты тұрғын үй бойынша туындаған мәселелердің барлығын жазбаша түрде көрсетіп, өзіне тапсыруды өтінді. Бұл ретте сөз алған қалалық құрылыс бөлімінің басшысы Болат Жақаев бүгінгі күні мердігер мекемемен мәселе анықталып жатқанын, егер оның тарапынан жіберілген қателіктер болған жағдайда, кепілдік мерзім ішінде қалпына келтіру жұмыстарын атқаратынын атап өтті.
Бұл жолы қала әкімінің қабылдауына 20-ға тарта тұрғын жазылып, толғандырып жүрген сауалдарына жауап алу мүмкіндігіне ие болды. Олардың дені электр жарығымен қамтамасыз ету, терможаңғырту бағдарламасы, ПИК жұмысы, мүлікті жекешелендіру, жол жөндеуге қатысты тұрғындарға ортақ мәселелер екенін айта кету керек.
Асан МЫРЗАХАН, «Семей таңы»
