25 сәуір күні, Семей қаласына Сауд Арабиясы Корольдігінен арнайы делегация келді. Шетелдік меймандар жақында ғана пайдалануға берілген туберкулезге қарсы балалар ауруханасын ресми түрде тапсырды. Шығыс Қазақстан облысында заманауи үлгімен салынған денсаулық мекемесін қабылдап алу құжатының қол қою рәсіміне қала әкімі Ермак Сәлімов қатысты.
Семей қаласындағы туберкулезге қарсы балалар ауруханасы Сауд Арабиясы Корольдігі мен Шығыс Қазақстан облысы әкімдігі арасында қол қойылған меморандум аясында бой көтерген болатын. Сексен орындық емхана туберкулезбен ауыратын балаларға профилактикалық, диагностикалық және стационарлық көмек көрсетеді. Бүгінде жаңа нысанның жұмыс жасап жатқанына бір жыл болған. Осы уақыт аралығында шетелдіктер нысанды бақылауларына алып, толықтай жұмыс істеп тұрғанына көздері жеткеннен кейін барып елімізге тапсырып отыр. Құжаттарға қол қою рәсімінде алғаш болып сөз алған Сауд Арабиясы Корольдігі өкілдері елдерінің қаржы министрлігі атынан ризашылықтарын білдіріп, емхананың ел игілігі үшін қызмет ететініне сенім білдірді. Мәртебелі меймандар сондай-ақ болашақта да осы сынды бірқатар жобаларға қатысатындарын жеткізді. Ал қала әкімі Ермак Сәлімов шетелдік қонақтарға осы уақытқа дейін атқарылған ауқымды істері үшін, сондай-ақ өңіріміздегі жобаларға қатысуға ниет білдіріп отырғандары үшін алғыс айтты.
— Биыл барша әлемге өзінің қауіп-қатерін төндірген Семей ядролық полигонының жабылғанына 25 жыл толып отыр. Семей ядролық полигонын жабу Елбасы Нұрсұлтан Назарбаевтың орасан зор еңбегі арқасында іске асты. Мемлекет басшысы жуырда АҚШ-қа жасаған ресми сапары кезінде әлемдік қауымдастықты Семей қаласына назар аударуға шақырған болатын. Президент бірінші кезекте ядролық сынақтардан зардап шеккен тұрғындарды сауықтыруға атсалысуға шақырған еді. Сіздердің атқарып жатқан жұмыстарыңызды осы салаға қосқан үлестеріңіз деп білеміз. Сондықтан сіздерге ризашылығымыз зор,- деген Ермак Бидахметұлы бүгінгі күні заман талабына сай ғимарат пен заманауи құрылғылардың және білікті дәрігерлердің нәтижелі жұмыстарының арқасында әлемді шарпыған дерттің өңіріміздегі балалар арасындағы ауру көрсеткіші біршама төмендегенін атап өтті. Шаһар басшысы ресми шара соңында мәртебелі меймандарға естелік сыйлықтар табыстады.
Делегация құрамы адамдар арасындағы жақсы қарым-қатынас әлемдегі татулықтың кепілі екенін, болашақта да қос ел достық қарым-қатынаста болатынын айта келе, қатерлі індеттің елімізде мүлде болмауына тілектестік білдірді.
Асан МЫРЗАХАН, «Семей таңы»
