Қалалық әкімдікте «Теплокоммунэнерго» МКК-не тұтынылған жылу үшін берешек заңды тұлғалармен жұмыс жүргізу мақсатында арнайы жиын өтті. Басқосуға қала әкімі Ермак Сәлімов, қала прокуроры Тәжиден Найманов, кәсіпкерлік бөлімнің басшысы Марат Нүгеров және жылу беру мекемесінің басшылары қатысты.
Аталмыш жиынға, негізінен, қаламыздағы жылу үшін қарызы бар мекемелер өкілдері жиналыпты. Жалпы саны 265 жекеменшік субъектісіне аталмыш жиынға қатысу туралы хабарландыру жіберілгенімен, залда отырғандар саны жиырмаға толмады.
Жиын барысында алғы сөз алған қала әкімі Ермак Сәлімов жылу алдындағы қарызды өндіру мақсатында арнайы жұмыс тобы құрылғанын, аталмыш бағытта кешенді шаралар жүргізіліп жатқанын айта келе, алдағы жылу беру маусымына тыңғылықты даярлық жасау қарызды өтеумен тығыз байланысты екенін жеткізді.
Жиын барысында сонымен қатар қала прокуроры да сөз алып аталмыш мәселеге байланысты пікір білдіріп өтті. Көп жағдайда тұрғындар өз құқықтарын қорғауда белсенділік танытқанымен, өздері жауапты саналатын міндеттерді орындауда олардың салғырт екенін атап өтті. Мәселен, жылу ақысын төлеу — әрбір абонементтің міндеті. Бірақ бұл мәселе биыл да күрделі күйінде қалуда. Аталмыш жиын барысында анықталғандай, қаламыздағы бірқатар іргелі сауда орындары мен қонақ үй сынды қоғамдық қызмет көрсету мекемелері жылу берушілер алдында миллиондап қарыз көрінеді. Олардың көпшілігі берешекті төлеуге асығыстық танытпайды. Бұл дұрыс емес екендігін айтып өткен қала әкімі Ермак Бидахметұлы ендігі аралықта борышкерлер үшін жаза қатаңдатылатынын жеткізді. Яғни қарыз мекемелер мен тұрғын үйлер үшін жылу берілмейді. Ол үшін жертөлелердегі жылу беру құбырлары қиылады. Ал оны қайта қостыру үшін қосымша ақы алынатын болады.
Жиын барысында сонымен қатар қарызды бөліп төлеу, сәуір айының ауа райы жылы күндері бөлме температурасын төмендету әрі отын мен жылу энергиясын үнемдеу сынды бірқатар мәселелер ортаға салынды. Басқосу соңында қатысқан заңды тұлғалар өз қарыздарын айдың аяғына дейін, яғни сәуірдің 30-шы жұлдызына дейін толық өтейтіндіктерін айтып уәде берді.
«СТ» — ақпарат
