Семей қаласының Степной кентінде Тәуелсіз-діктің 25 жылдығына, Семей ядролық сынақ полигонының жабылғанына 25 жыл толуына орай, сондай-ақ Әлихан Бөкейханның 150 жылдығы мен Қайым Мұхамедхановтың ғасыр тойына арналған және Қазақстан халқының бірлігі күніне орай ұлттық ат спорты түрлерінен қалалық жарыс өтті.
Жарысқа Семей өңірінің ат спортын меңгерген өрендері қатысып, спорттың тоғыз түрінен (тай жарыс, аударыспақ, құнан жарыс, теңге алу, жорға жарыс, қыз қуу, топ бәйге, қой көтеру, аламан бәйге) сайысқа түсті. Бұқаралық спортты дамыту және ұлттық спорттық өнерді жас ұрпаққа дәріптеу мақсатында ұйымдастырылған шараның салтанатты ашылуына Семей қаласының әкімі Ермак Сәлімов арнайы қатысып, дүбірлі додаға қатысушыларға өз құттықтауын жеткізді.
— Бүгін баршамыз бас қосып, дәстүрлі шарада кездесіп отырмыз. Айтулы сайыс Тәуелсіздігіміздің 25 жылдығы және Семей ядролық сынақ полигонының жабылғанына 25 жыл толуы қарсаңында қолға алынып отыр. Биыл еліміз Жеңістің 71 жылдығын атап өтеді. Бұл айтулы мерекелер баршамызды береке-бірлікке, татулыққа үндейді. Баршаларыңызды алда келе жатқан мерекелермен шын жүректен құттықтаймын. Аттарыңыз бәйгелі болсын,- деген Ермак Бидахметұлы ат спорты түрлерінен қалалық жарыстарды дайындауға және өткізуге белсене қатысқан бірқатар азаматтарға ризашылығын білдіріп, қала әкімінің алғыс хаттарымен марапаттады.
Ат спорты түрлерінен өткізіліп отырған жарыстың негізгі мақсаты — ат спорты түрлерін дамыту арқылы салауатты өмір салтын қалыптастыру, сондай-ақ Шығыс Қазақстан облысы әкімінің жүлдесіне арналған ХХ Халықтық спорт ойындарына қатысуға ат спортынан командаларды іріктеу. Айта кетуіміз керек, мұндай ауқымды жарыстың өңірімізде өтпегеніне біраз жыл болыпты. Ал Қазақстан ұлттық спорт түрлері қауымдастығының Семей қалалық филиалының директоры, жарыстың бас төрешісі Нәдірбек Әпсәләмов Семей қаласының әкімі Ермак Сәлімовтің оң көзбен қарауының арқасында ұлттық ат спорты түрлерінен қалалық жарыс өткізуге көңіл бөліне бастағанын атап өтті.
— Халқымыз ежелден ат спортын жоғары орынға қойған. Бүгін, міне, мұндай ұлттық ойындарды ұлықтаған жарыс қала әкімінің бастамасымен іске асып отыр. Осы ретте қолдау танытқан Ермак Бидахметұлына ризашылығымызды білдіріп, алғысымызды айтамыз,- деді Н.Әпсәләмов.
Жарыстың көрігі, әрине, аламан. Аламан бәйгеде Семей қаласынан С.Ықласовтың сәйгүлігі І орынды, Павло-дар облысынан Р.Нығмановтың тұлпары ІІ орынды, Зайсан қаласынан Е.Төкеновтің сәйгүлігі ІІІ орынды иеленді. Жорға жарыста Бесқарағай ауданынан Т.Закуовтың жорғасы бірінші, Абай ауданынан келген Ә.Тілеуғалидың жорғасы екінші, катонқарағайлық М.Ахметовтің бәйге аты үшінші болып мәре сызығын кесті.
Айта кетуіміз керек, бағдарламаға сәйкес келген көпшілік үшін ұйымдастырылған қой көтеру жарысы да көпшілік назарын аудартпай қоймады. Бұл сайыста Шопан ата түлігін 105 рет көтерген Қанат Қасайынов жеңімпаз атанды. Барлық жеңімпаздар дипломдармен, бағалы сыйлықтармен марапатталды.
Асан МЫРЗАХАН, «Семей таңы»
