1 Мамыр – Қазақстан халқының бірлігі күні. Біз бейбіт аспан астында көптеген ұлттардың басын біріктіріп, татулықта өмір сүріп келеміз. Дәл осы күні Қазақстанды ортақ үйі санайтын барлық ұлттар мен ұлыстар татулық пен бірлікті дәріптеп мерекені салтанатты түрде атап өтті.
Береке мен бірліктің туы желбіреп, еңбек пен достықтың күйін шертетін ғажайып мезгілді Семей жұртшылығы асыға күтеді. Шаһардың Орталық алаңында өткен арнайы ынтымақ мерекесін атап өту шарасына Семей қаласының әкімі Ермак Сәлімов қатысып, тұрғындарға деген игі тілегін жеткізді.
— Құрметті семейліктер, ардақты ағайын! Халқымыздың достығы мен татулығын, бейбітшілігі мен бірлігін айғақтайтын мемлекеттік мереке — Қазақстан халқының бірлігі күні құтты болсын. Бұл күн тұрақтылық пен келісімнің, ынтымақ пен ырыстың, бақыттың мейрамы. Бұл — Мемлекет басшысы Нұрсұлтан Назарбаев жүргізіп отырған сындарлы саясаттың жарқын көрінісі. Елбасы алдымызға қойған міндеттерді орындауда, келер ұрпаққа көркейген елді, нығайған бірлікті, тұрақтылық пен байлықты мирас ету жолында баршаңызға сәттілік тілеймін. Мерекелеріңіз құтты болсын, жерлестер! Тәуелсіз еліміздің еңсесі биік, тұғыры берік, болашағы баянды болсын,- деді Ермак Сәлімов өз құттықтау сөзінде.
Елімізді мекен ететін түрлі ұлттар мен ұлыстар, тегі басқа болғанмен, тілегі бір, арманы ортақ біртұтас халыққа айналды. Ұлттар тұтастығы мен достығының арқасында бүгінде мемлекетіміз өркендеп, ілгері басып келеді. Бүгінде Семейде 40-тан астам өзге ұлт пен ұлыстың өкілдері тұрады. 17 этномәдени орталық бар. Барлығы мереке күні жеке-жеке ауыл құрып, концерттік бағдарлама ұсынып, бірліктің бекемдігін көрсетті.
Қазақстан бірліктің арқасында көптеген жетістіктерге жете білді,- деген «Возрож-дение» неміс ұлттық бірлестігінің төрайымы Лилия Гончарук Елбасымыз Н.Назарбаевтың сарабдал саясатының нәтижесінде елімізде ұлтаралық толеранттылық пен қоғамдық келісімнің айрықша қазақстандық үлгісі жасалғанын айтады.
— Қазақстан халқының бірлігі күні — керемет мереке. Бүгінгі қазақстандық келісім мен толеранттылық үлгісіне өзге мемлекеттердің қызығушылық танытып отырғаны жасырын емес. Біз үшін бір шаңырақ астында тұрып жатқан ұлттардың бірлігі мен достығы әрқашан бірінші орында тұра бермек,- деді Лилия Павловна.
Орталық алаңдағы мереке жоғары деңгейде аталып өтілді. Түрлі сайыстар, этномәдени орталықтар мен қала мұражайларының қолөнер көрмесі ұйымдастырылды.
Асан МЫРЗАХАН, «Семей таңы»
