9 Мамыр – Жеңіс күні мерекесі семейліктер үшін айтулы тартумен толықты. Атап айтсақ, осынау күні кешкісін шаһардағы Орталық алаңда құрылысы өткен жылы басталған ерекше субұрқақтың салтанатты түрдегі ашылуы өтті.
Қала өміріндегі осынау маңызды шараға кешкілік сейіл құрған жергілікті тұрғындар мол жиналды. Әсем әуен аясында әдемі субұрқақтың ашылу салтанаты тамашалауға келген баршаны ерекше қуанышқа бөледі. Орталық алаңдағы жаңа нысанның басты ерекшелігі сол — субұрқақ түрлі түске боялып, әуенге елітіп билейді. Жалпы, судың екпіні 18 метр биіктікке дейін жетіп, 10-нан астам ән мен күйге ырғақ қосады екен. Былайша айтсақ, биші субұрқақтың репертуарында тек классикалық әндер ғана емес, қазақтың дәстүрлі шығармалары да бар. Айта кету керек, аталмыш нысанның құрылысы облыс әкімі Даниал Ахметовтің бастамасымен өткен жылы басталған болатын. Басты мақсат — шаһардың сәнін кіргізіп, Орталық алаңда кешқұрым сейілдеуші қала тұрғындары үшін жағымды эмоция сыйлау. Сонымен қатар бұл нысанның қаламыздың мәдени келбетін де жақсарта түсетіні анық. Бұл – қаладағы алғашқы әуенді, биші субұрқақ. Нысанды салуға облыстық бюджеттен 200 миллион теңгеден артық қаражат жұмсалыпты. Аталмыш салтанатты шараны тамашалауға келгендер арасында, жастармен қатар, аға буын өкілдері де мол екен.
— Бұл жерге енді біздің ардагерлер келіп демалатын болады. Осы жерде қаламыздың қонақтары, біздің достарымыз, жастарымыз, ғашықтар уақыттарын тиімді өткізе алады. Өзіміз бала-шағамызбен келіп демалатын алаңда әдемі бір субұрқақтың ашылуына куә болдық. Осы субұрқақтың суы қандай мөлдір де таза болса, біздің ниетіміз, тілегіміз де сондай таза болсын! Қалалықтарды осынау қуаныштарымен құттықтаймын,- деді өз сөзінде шаһар тұрғыны Нағима Мойынбаева.
Жаңа нысанның ашылу салтанаты мерекелік концерттік бағдарламаға ұласты. Ал сағат түнгі 22.00- де Семей аспанын әдемі отшашулар әрледі.
Қ. ӘЛІМБЕК, «Семей таңы»
