Шығыс Қазақстан облысының әкімі Даниал Ахметов Семей қаласында тұратын соғыс ардагерлерін Жеңіс күнімен құттықтап, Мемлекет басшысы Нұрсұлтан Назарбаевтың атынан жарты миллион теңгенің сертификатын табыстады.
Аймақ басшысы Даниал Ахметов алдымен соғыс ардагері Николай Верещагиннің шаңырағына бас сұқты. Майдангер 101 жаста. 1940 жылы Семей қаласынан әскер қатарына шақырылған жас сарбаз Отан алдындағы борышын өтіп жүргенде, соғыс басталғандығы жайлы суық хабарды естиді. Николай Александрович 1941 жылы Смоленск қаласы түбіндегі ұрысқа қосылып, кейін 2-ші Украин майданына аттанады. Одан ары қарай Молдованы, Румынияны, Венгрияны, содан соң Чехословакия мен Австрияны азат етуге қатысады. Жеңісті ақсақал Австрияның астанасы Венада қарсы алған екен. Соғыс ардагері Николай Верещагин майдандағы ерлігі үшін Қызыл Жұлдыз орденімен, «Мәскеуді азат еткені үшін», «Будапешті азат еткені үшін», «Венаны азат еткені үшін», «Германияны жеңгені үшін» сынды медальдармен марапатталған. 1948 жылы майдангер Семей қаласына оралып, Жоғары Ертіс бассейнінде қызмет атқарады. Соғыстан кейінгі өндірісті өркендетуге өз үлесін қосады. Зейнеткерлікке шыққан соң жас ұрпаққа арнап өзінің өмірден түйгендерін, қатарластарының ерлігі жайлы естеліктерін қағаз бетіне түсіріп, екі кітап қылып жарыққа шығарған. Өзін құттықтай келген аймақ басшысына майдангер осы еңбектерін сыйға тартты.
Сондай-ақ аймақ басшысы соғыс ардагері Қалиасқар Искаковты да мерекемен құттықтады. Даниал Кенжетайұлымен өрбіген әңгімеде майдангер өзінің әскер қатарындағы жылдарын еске алды. Қарт жауынгердің айтуынша, 1941 жылы Алматы жаяу әскер училищесінің курсанты болған. Майдангер Мәскеу түбіндегі Красное және Крюково селоларындағы қантөгіс шайқастарға қатысады. Аяғынан ауыр жараланып, госпитальда емделеді, одан шыққан соң Кутузов орденімен марапатталған. Майдангер сонымен қатар Ленинград, 3-ші Прибалтика және 1-ші Украин майдандарында соғысады.
Аймақ басшысы ардагерлерді айтулы мерекемен құттықтап, отбасыларына амандық, дендеріне саулық тілейтінін айтты. Сондай-ақ Даниал Кенжетайұлы Ұлт Көшбасшысы Нұрсұлтан Назарбаевтың тапсырмасымен Жеңіс күні мерекесі қарсаңында 500 мың теңгенің қаржылай сертификатын табыс етіп отырғанын атап өтті. Жеңіс күніне орай сыйлық алған ардагерлер де өздеріне әрқашан да қамқорлық танытатын Мемлекет басшысына алғыстарын білдірді.
Асан МЫРЗАХАН, «Семей таңы»
