Құқықтық сауаттылық — қай кезеңде болмасын күн талабынан түспейтін мәселе. Қоғамдағы көптеген келеңсіздіктер заң нормаларын жете білмеуден, қала берді әр азаматтың өз құқығын білмеуден келіп туындап жатады. Ал бұл олқылықтың орнын толтыру мақсатында қазіргі таңда тиісті органдар тарапынан түрлі іс-шаралар ұйымдастырылуда.
Өткен аптаның жұмасы күні Шығыс Қазақстан облыстық прокуратурасы, Қазақстан Республикасы Тәуелсіздігінің 25 жылдығы құрметіне орай, Семей қаласында «Мәңгілік Елдің «Заң керуені» атты кең көлемді акция ұйымдастырды. Аталмыш игілікті шараға облыс прокуратурасының 150-ден астам қызметкерлері арнайы келіп қатысты. Ал қарапайым қалалықтар үшін берері мол акцияның беташар рәсімі қалалық әкімдіктің кең залында өтті. Шараның ашылу рәсіміне облыстың бас прокуроры Бағбан Тайымбетов, «Нұр Отан» партиясының ШҚО бойынша филиалы төрағасының бірінші орынбасары Әнуарбек Мұхтарханов, Семей қаласының әкімі Ермак Сәлімов, облыс прокурорының орынбасары Виталий Шабер, Семей қаласының прокуроры, әділет кеңесшісі Тәжиден Найманов, Шығыс Қазақстан облыстық кәсіпкерлер палатасының төрағасы Игорь Шацких келіпті. Зал толы прокуратура саласының қызметкерлері алдында аймақтың бас прокуроры Бағбан Тайымбетов кіріспе сөз алды.
— Бұл ұйымдастырылып отырған акцияның мақсаты қала тұрғындарына құқықтық көмек көрсету, азаматтардың қорғалуы, құқықтық мәдениетін арттыру және туындайтын мәселелерді шешу болып табылады,- деді өз сөзінде облыстың бас прокуроры. — Сондай-ақ тұрғындар сауалдарына жауап беру, әсіресе қазіргі қоғамымыздағы өзекті болып отырған жайттар турасында мағлұматтарға қанықтыру. Осы мақсатта арнайы келіп отырған 150 прокурор қаланың сауда орындары мен базарларын аралап, тұрғындар сұрақтарына орай, заң талаптарын түсіндіріп, олардың жеке құқықтары туралы айтып береді. Және, ең бастысы, Жер заңнамасының нормаларын, сондай-ақ Қазақстан Республикасы Президентінің қолданыстағы «Жер кодексінің жеке нормаларына мораторий енгізу туралы» Жарлығын түсіндіруге баса назар аударылатын болады. Қазір көрші Бесқарағай, Бородулиха аудандарында да прокурорлар халыққа Жер кодексінің өзгерістерін түсіндіріп жатыр. Егер халық Жер кодексіндегі өзгерістердің мына тұсына келіспейміз деп жатса, оны да ескеру қажет,- деді облыстың бас прокуроры.
Аталмыш жиын барысында пікір білдірген шаһар әкімі Ермак Сәлімов те ұйымдастырылып отырған «Заң керуені» акциясының береріне тоқталып өтті.
— Бұл шарада тек мораторий жарияланған Жер кодексі түсіндіріліп қана қоймай, тұрғындардың құқықтық сауатын арттыруға да мән беріледі,- деді қала басшысы.- Қажетті ақпарат жетпегендіктен, түрлі проблемалар туындайды. Сондықтан да қарапайым халыққа жер мәселесін түсіндіру, осы реттегі олардың да талап-тілегін ескеру қажет деп ойлаймын.
Осылайша, облыс прокуроры Б.Тайымбетовтің төрағалығымен Семей қаласы әкімдігі, «Нұр Отан» партиясы мен облыс прокуратурасының құрылымдық бөлімшелері басшылары кіретін штаб өз жұмысын бастап кетті. Акция барысында прокурорлар қаланың жоғары оқу орындарына, ірі сауда кешендеріне, базарларға, қоғамдық орындарға, адамдар көптеп жиналатын көшелерге, сондай-ақ қаланың Холодный ключ, Бобровка, Водное, Восточный саяжайлары, Жазық аудандарына, сондай-ақ Семей қаласының әкімшілік-аумақтық бірлігіне кіретін ауылдық округтеріне барды.
Қуаныш ЖОЛЫМБЕТ, «Семей таңы»
