Өткен аптаның сенбіcі күні қала әкімі Ермак Сәлімов бастаған әкімдіктің бөлім басшылары және коммуналдық қызмет көрсету мекемелерінің жетекшілері шаһардың Комсомол кентінің іргесіндегі жаңадан салынған үйлердің тұрғындарымен кездесті.
Айта кетерлігі сол, кенттің күнгейінен бой көтерген бұл үйлер қаланың ең жаңа көшелерін құрайды. Шамамен он шақты жылдың көлемінде салынған жаңа баспана иелерінің жергілікті атқарушы билік иелеріне айтары көп екен. Ең басты мәселе — электр қуаты. Арнайы трансформатор мен электр бағаналары құрылмағандықтан, әр үй қуат көзін көршілерінен алуға мәжбүр. Сәйкесінше, тұтынылған ақыны да бөліп төлейді. Екінші кезектегі мәселе – ауыз су. Тұрғындар тіршілік көзін бір шақырымдай жердегі колонкадан тасымалдап ішуге мәжбүр. Одан кейінгі мәселе — жолдың жоқтығы мен әр үйдің маңайында үйілген қоқыстың шығарылмауы. Одан өзге де тұрғындар үшін өзекті мәселелер қатары баршылық екен. Ал мұның барлығының бір ғана себебі, аталмыш аумаққа бір замандарда үй салуға рұқсат берілгенімен, кейінгі жылдарда құрылыс мақсатында жер сатуға мораторий жарияланып, тиісті коммуналдық инфрақұрылымның жүргізілмеуі болып отыр. Мұны тұрғындар да жақсы біледі. Сондықтан да тұрмыс тауқыметіне сабыр етумен келеді. Тек әкімдікке қояр басты екі өтініштері бар – әр үйге талапқа сай электр қуатын жеткізіп, ауыз су мәселесін шешіп беру ғана. Ал жол жуық арада салынады деп үміттенбейді. Бұл проблемамен тоқайласып отырған шамамен 100-дің үстіндегі шаңырақ екен.
Жиын барысында қала әкіміне арыз-шағымдарын ақтарған тұрғындар өкпе-реніштерін де жасырмады. Десек те жұртшылықты жұбатқан шаһар басшысы аталмыш бағытта жұмыс жүргізіліп жатқандығын, анығырақ айтқанда, ілгерілеу бар екенін жеткізді. Яғни электр қуаты мәселесін шешу бойынша тиісті құжаттамалар реттеліп, арнай жоба жасалынған. Тек оның жүзеге асу мерзімі келесі жылға белгіленіп отыр. Аталмыш жобаның құны 159 млн. теңге деп межеленуде. Алайда оның нақты көлемін алдағы уақытта сараптамалық комиссия нақтылайтын болады. Ал тұрғындардың ауыз су мәселесі биылғы жазда жартылай шешіледі деуге негіз бар. Аталмыш жиын барысында аталмыш аумақ үшін жазғы мезгілге арналған уақытша су құбыры тартылмақ. Бұл жайында «Семей Водоканал» МКК техникалық директоры Н.Лукин мәлімдеді. Айта кетерлігі сол, «Ақбұлақ» бағдарламасы аясында 2020 жылы қаламыздағы барлық жеке секторлардағы тұрғын үйлерге ауыз су жеткізілуі тиіс. Ол алдағы уақыттың еншісінде.
Қала әкімі аталмыш аумақта қордаланған мәселелердің бар екендігін тілге тиек ете келе, бюджеттің бүйіріне қарай тұрғындар тілегінің орындалатынын жеткізді.
Қ.ӘЛІМБЕК, «Семей таңы».
