Семейде балалар мен жасөспірімдердің футбол орталығы жабылмайды. Бұл туралы Семей қаласына жуырда жұмыс сапарымен келгенде Шығыс Қазақстан облысының әкімі Даниал Ахметов мәлім еткен еді.
Аталған мәселе бойынша сөз қозғаған аймақ басшысы Семей қаласындағы балалар мен жасөспірімдердің футбол орталығының жабылуы туралы ақпаратты БАҚ арқылы естіген екен. Даниал Кенжетайұлының айтуынша, Семейде облыстық футбол академиясының филиалы ашылмақ. Аталмыш мектепте балаларды жаттықтырумен әлемде футбол мектептерін құру және дамыту саласына мамандандырылған испандық «Soxna» компаниясының мамандары айналысады.
— Біз Семей қаласынан облыстық футбол академиясының филиалын ашуды жоспарлап отырмыз. Екінші жарты жылдықтан бастап қаржыландыру басталса, келер жылы испандық жаттықтырушылар жұмыс жасайтын болады. Сондықтан семейліктерге айтарым — қаладағы балалар футбол орталығы жабылмайды. Ата-аналардың алаңдауына еш негіз жоқ,- дейді Даниал Кенжетайұлы.
Аймақ басшысының айтуынша, атқарылып жатқан жұмыстардың барлығы да ШҚО–ның футболын жаңа деңгейге көтеру мақсатында қолға алынуда. Сол себепті жас аяқдопшыларды әлемге танылған тәжірибелі мамандар жаттықтыратын болады. Ал аталмыш мектептен шыңдалып шыққан жасөспірімдер болашақта еліміздің жаңа футболшылар буынын қалыптастырмақ.
Асан МЫРЗАХАН, «Семей таңы»
