Бүгінде Семей қаласы бойынша жеке сектордағы тұрғын үйлер саны артып, жаңадан көшелер мен тұтас мөлтек аудандар біртіндеп бой көтеруде. Осы себепті шаһардың шеткі аудандарынан жаңадан баспаналар салынып, қоныстанушылар қатары артуда. Әлбетте, жаңадан тұрғызылған аудандармен қатар қосымша мәселелер де туындайтыны белгілі. Дегенмен жергілікті атқарушы билік мұндай тұрмыстық проблемалар қатарын ретімен шешіп, халықтың әлеуметтік тұрғыда қамсыздандырылуын бір ізге түсіруде.
Әйтседе тұрғындар тарапынан түсіп жатқан өтініштер қатары да бар. Мәселен, жуырда қала әкімінің орынбасары Қайрат Ерембесов пен қалалық әкімдіктің бөлім басшылары, коммуналдық қызмет өкілдері қаланың Шүлбі көшесінің жұртшылығымен кездесіп, талап-тілектеріне көңіл аударды. Нақтырақ айтсақ, Жоламан кентінен Суықбастау ауданына бағыт түзейтін тас жолдың оң қанатында жаңадан тұрғызылған үйлер иелерінің айтары бар екен. Соның бірі — жарық мәселесі. Арнайы келісімшарт жасалынып, тиісті құжаттамалар әзірленбегендіктен, мұндағы көршілер электр қуатын бір-бірінен алып отыр. Аталмыш сауалға жауап берген облыстық мәслихат депутаты Әсемхан Досқожанов бұл проблеманың алдағы тамыз айында толыққанды шешім табатынын жеткізіп, көпшілікті қуантып тастады. Ол үшін 37 млн. теңге бөлінген. Конкурс өтіп, жақын арада мердігер компания анықталмақ. Жоба даяр, қаржы бөлінген. Бұл қаражатқа осы аумақтағы төрт көшенің бойы электрлендірілетін болады. Осы ретте тұрғындар келесі өтініші — күре жол мәселесін жеткізді. Анығын айтқанда, Суықбастау кентін қаламен жалғап тұрған тақтайдай тегіс жолмен көліктер жоғары жылдамдықпен зымырайды екен. Бұл көшені кесіп өтушілер үшін қауіпті. Сол себепті тұрғындар мұндағы жүретін көліктер жылдамдығын 40 шақырымнан асырмаса және осыны көрсететін жол белгісі қойылса деген өтінішін жеткізді. Аталмыш мәселені шешу қиынға түспейтінін жеткізген қала әкімінің орынбасары Қайрат Ерембесов тұрғындардың бұл өтініштерін орындауға уәде берді.
Тұрғындарды толғантқан тағы бір мәселе – ауыз су. Алматы-Семей трассасы маңына салынған үйлер тіршілік көзін бір шақырымдай жердегі колонкадан тасымалдап ішеді. Қалалық әкімдіктің бөлім басшылары бұл мәселені де қойын дәптеріне түртіп алды.
Сонымен қатар аталмыш аумақтағы үйілген қоқыс пен су ағатын жылғалар мәселесі де көтерілді. Жыл сайын көктем мезгілінде осы маңайдағы жекелеген тұрғын үйлер аулаларына еріген қар суы кіреді екен.
Облыстық мәслихат депутаты Әсемхан Досқожанов жұртшылық өтініштеріне жауап қайыра келе, қозғалған мәселелердің барлығы кезегімен шешімін табатынын жеткізді. Ең бірінші кезекте тамыз айында әр үйге электр желілері тартылатын болады. Осыдан соң ауыз суға байланысты арнайы жоба әзірлеу көзделмек. Сонымен қатар Жоламан мешітінің маңайы жарықтандырылып, кіреберіс жолға асфальт төсеу де көзделуде.
Қуаныш ЖОЛЫМБЕТ, «Семей таңы»
