Өткен аптаның жұма күні қаламыздағы ақпарат орталығында қала әкімінің орынбасары Қайрат Ерембесовтің қатысуымен баспасөз мәслихаты болып өтті. Аталмыш шараға қалалық жер қатынастары бөлімінің басшысы Сүлеймен Медеуов, шаһардың бас сәулетшісі Қалдыбек Қоқиланов және БАҚ өкілдері қатысты.
Бұл күнгі қозғалған негізгі тақырып тұрғындарға, яғни жекеменшік иелігіне әр азаматқа 10 соттықтан жер беру мәселесі болатын. Басқосуда алғы сөз алған қала әкімінің орынбасары Қайрат Ерембесов кең көлемде түсінік беріп өтті.
— Соңғы уақытта қаламыз бойынша 10 соттықтан жер алуға өтініш берушілер саны күрт артып отыр. Яғни тұрғын үй құрылысын салу мақсатында тегін берілетін телім үшін соңғы 4 айдың ішінде 5 мың адам өтініш беріпті. Ал осыған дейін кезекте тағы бес мың адам тұрған болатын. Әйтсе де бұл ретте ескерте кетер бірқатар мәселелер бар. Айта кетсек, әрбір ҚР азаматына 10 соттықтан жер беру туралы заң бұрыннан бар, бірақ құрылыс салу мақсатындағы жер учаскелерін беруден бұрын мемлекет ол аймақты даярлауы қажет. Яғни, коммуналдық қызмет үшін инженерлік инфрақұрылым жүйесін жүргізу бірінші кезекте орындалуы тиіс. Оның ішінде, әлбетте, электр желісі мен су құбыры тартылуы керек. Ал онсыз жер берілмейді. Алайда өтініштер қабылдана береді. Яғни, азаматтарды тізімге аламыз. Қазіргі күні қаламыз бойынша жер беруге мораторий жарияланғаны белгілі,- деді өз сөзінде Қайрат Ерембесов. Қала әкімінің орынбасары сонымен қатар аталмыш тақырыпта түсінбеушілік пен негізсіз сөздер жүргенін де жеткізе кетті. Аталмыш тақырып бойынша қалалық жер қатынастары бөлімінің басшысы Сүлеймен Медеуов те түсінік беріп өтті. Қазіргі күні еліміздің әр азаматына тегін жер беру өзге өңірлерде де өткір тұрған мәселелер қатарына жатады. Мәселен, Алматы қаласы бойынша 112 мың адам өтініш берсе, Астана қаласы бойынша 101 мың адам кезекте тұр. Ал Семей қаласы бойынша 10 мың адам шамасындағы тұрғын тізімге алынған. Сүлеймен Медеуұлы айтып өткендей, әрбір азамат бір мәрте ғана 10 соттықтан жер алуға құқылы. Дегенмен өтініш бергендер арасында қайталанған аты-жөндер де бар. Ал тіркеуге алынған өтініштер арнайы құрылған комиссияның қарауынан өтеді. Содан кейін ғана нақты шешім шығарылады. Алайда, жоғарыда айтып өткендей, ол үшін тұрғын үй құрылысын салуға даярлық керек. Өйтпеген жағдайда, күрделі проблема туындайды. Мұндай мәселелер қаламызда қазіргі күннің өзінде де бар. Ал қала іргесіндегі телімдердің инженерлік инфрақұрылымының даярлануы жайлы қаланың бас сәулетшісі Қалдыбек Қоқиланов түсінік беріп өтті. Алдағы уақытта шаһардағы құрылыс жұмыстары, оның ішінде жаңадан тұрғын үйлер салу ісі бекітілген Бас жоспар аясында жүзеге асатын болады. Ал бұл ретте қала бойынша Суықбұлақ, Комсомол, Ақсай елдімекендерінде инженерлік инфрақұрылым жүргізу ісі көзделуде. Биылғы жылы Суықбұлақ кентінде жоспарлы шаралар жүргізілмек. Бірінші кезекте электрлендіру жұмыстары қолға алынбақ. Бағаналар орнатылған. Сонымен қатар Ақсай аумағы бойынша екі кезеңмен жұмыс жүргізілетін болады. Жалпылама алғанда, бұл аудандардың барлығы тұрғындар қажеттілігін өтей алмайды. Сол себепті қосымша қордағы жер телімдері қарастырылмақ. Бұл ретте Суықбұлақ кентіндегі Жібек жолы аумағы, Жарқын елдімекені маңы, Ақсай мен Птичник аумағы арасындағы Аққайың сынды жер алаптарына келешекте ел қоныстанбақ.Қорыта айтқанда, жер беру мәселесінде алдағы уақытта шешімін күткен бірқатар мәселелер бар. Оның барлығы кезең-кезеңімен шешімін табатын болады. Сол үшін де алаңдауға, асығыстық жасауға негіз жоқ.
Қуаныш ЖОЛЫМБЕТ, «Семей таңы»
