Жуырда аудандағы Бестерек, Ақжар және Үржар ауылдық округтерінің әкімдері халық алдында есептік жиын өткізді. Аудан әкімі Серік Зайнулдин ауыл басшыларының есептерін тыңдады, пікір айтты. Үш ауыл да мәуелі жеміс пен алтын астық өндіріп отырған округтер. Жылдың жағымды жаңалықтары мен қуанышты оқиғалары да жетерлік. Бестерек ауылында жуырда ғана жаңа амбулатория үйі пайдалануға берілді. Ауыл ортасынан саябақ ашуға аудан басшысы үлкен көмек көрсетті. Округ әкімі Талғат Ерғазы мұны өз баяндамасында атап өтті. Дейтұрғанмен, тұрғындардың айтар ұсыныстары өтініштері де бар. Мәселен, ауызсу мәселесі орын алған, тіс дәрігері жоқ. Ауыл тұрғындары бір кездегі колхоздың алма бағына бір бағбанның керектігін де айтады. Сондай-ақ, мектептерге спорттық жабдықтар қажет дейді олар. Сол сияқты көшелердің жарықтандырылуы, мал табынын ұйымдастыру, ауыл тазалығы басты орындарда. Сөз алған Ерлан Ниязбекұлы, Қайырбек Саматеев, Қасымхан Көкеев, Әнуарбек Қайыров, Жәкен Еділбаев, Марина Сергиенколар өз ауылдарының бүгінгі жақсылығына сүйінсе, кемшін тұстарына қынжылыс білдірді.
Ақжар ауылдық округіне тағайындалғанына көп уақыт өте қоймаған Тәуіржан Шоманов алғаш рет есеп берді. Әкім ауылдықтар атынан аудан әкімі С. Зайнулдинге мектепке автобус бергені үшін алғыс айтты. Сондай-ақ өз сөзінде округтегі суармалы жерлердің игерілуі кемшін екенін айтты. Зоотехник, мал дәрігері мамандары жетіспейді. Ендігі арада бұл проблемаларды шешуге күш салынбақ.
{jcomments on}Үржар ауылдық округінің әкімі Сайлауғазы Шарықбаевтың жасаған баяндамасы көлемді болды. Аудан орталығы болған соң мұнда ауқымды жобалар қолға алынып, айтарлықтай шаруалар жасалған. Орталықтағы төрт жерге арка орнатылып, түнгі көшелерге әшекейлі жарықтар ілініп, безендірілген. Көгалдандыру жұмыстары жүргізілген. Абай, Воронков , Семушкина көшелеріне асфальт төселген. Семушкина көшесі жарықтандырылып, бірқатар көшелерінің бұрылыстары жөнделген. Екі қабатты үйлердің ауласына балалардың ойын алаңы жасалып, абаттандырылған. Сондай-ақ, орталыққа «Бәйтерек» монументінің 15 метрлік көшірмесі қо-йылды. Есеп беру жиынында ауыл тұрғындары мал өнімдері мен астық өткізу, ауылшаруашылық тауарларын сату, ауыл сыртындағы қатты қалдықтарды төгетін орындағы берекесіздік сынды мәселелерді көлденең тартты.
Барлық ауылдық округтерде сөйлеген сөзінде аудан басшысы Серік Зинабекұлы елді мекендердің тазалығы, ауызсу, салықтың түсуі, ауылшаруашылық бағытындағы жерлердің игерілмеуі, тұрғын үй, жаңа мектептердің құрылысы, елді мекендердегі «Туған жерге — тағзым» акциялары аясында жұмыс жасау, өндіріс орындарын салу сынды мәселелер төңірегінде ой қозғады. Сондай-ақ, аудан әкімі ауылдық округтерде өткен жиындардың барлығында да Елбасы Н. Назарбаевтың биылғы «Қазақстан -2050: Бір мақсат, бір мүдде, бір болашақ» атты Жолдауының басым бағыттары жайлы ақпарат беріп отырды.
Берікхан ТАЙЖІГІТ,
«Семей таңы».
