Өткен 6 мамыр күні «Шығысэнерготрейд» компаниясы электрмен жабдықтау қызметтеріне орташа тарифті кВт сағатына 13, 105 теңге көлемінде бекіту үшін ҚР ҰЭМ Табиғи монополияларды реттеу және бәсекелестікті қорғау комитетінің ШҚО бойынша департаментіне өтініш жіберген еді. Енді маусым айының орта тұсынан бастап белгіленген тариф құны қолданысқа енгізіледі деп жоспарлануда. Бұл жайында апта басында Семей қалалық әкімдігінде өткен қоғамдық тыңдауда мәлім болды.
Қоғамдық тыңдауға облыстық және қалалық мәслихат депутаттары, «Нұр Отан» партиясы Семей қалалық филиалының өкілдері, мемлекеттік мекемелердің қызметкерлері және қоғамдық ұйымдардың бір топ белсенділері жиналды. Отырыс ҚР ҰЭМ Табиғи монополияларды реттеу және бәсекелестікті қорғау комитетінің ШҚО бойынша департаменті басшысының орынбасары Людмила Устьянцеваның жетекшілігімен өтті. «Шығысэнерготрейд» компаниясының өкілі Елена Ивченко атап өткендей, тариф құнын көтеруге электр станцияларынан қажетті қуатты сатып алу шығындарының өсуі, шикізат материалдарының қымбаттауы және ағымдағы жылы қолға алынатын инвестициялық бағдарламаны іске асыру негіз болыпты.
— Біздің мекемеміз 2004 жылы құрылған еді. Кәсіпорын үлесінің басым бөлігі «ШҚ АЭК» АҚ-на тиесілі. Тұтынушылардың саны 400 мыңнан асып жығылады. Қызмет көрсету аумағымыз 282 мың шаршы шақырымды құрайды. Ағымдағы жылдың қаңтар — сәуір айларында залалды өтеу көлемі 604 млн. теңгеге дейін жетті. Осы ретте қазіргі белгіленген тариф құны мекеменің тиісті деңгейде жұмыс істеуіне жеткіліксіз екендігі анықталып отыр. Соған байланысты біз жабдықтау үстемеақыны кВт сағатына 0, 454 теңге көлемінде бекітуді жөн санап отырмыз. Әрине, бағаны 79%-ға өсіру тұтынушыларға қолайсыздық тудыруы ықтимал екенін жасырмаймыз. Алайда осы тарифтің негізінде бір жылда жабдықтау үстемеақының орташа есебі кВт сағатына 0, 369 теңгені құрайтын болады. Өткен жылы бұл көрсеткіш кВт сағатына 0, 336 теңге көлемінде тұрақтаған еді,- деп атап өтті Е. Ивченко.
Сондай-ақ басқосуда «Шығыс-энерготрейд» мекемесінің өкілі жинал-ғандарға ШҚО-ғы электр қуатының тарифі еліміз бойынша ең төменгі бағада екенін де айтып өтті. Қоғамдық тыңдауда үкіметтік емес ұйымдардың өкілдері монополистерге өздерінің көкейінде жүрген сауалдарын жолдап, пікір алмасты.
Жақсылық МҰРАТҚАЛИҰЛЫ, «Семей таңы»
