Өз қаласының көркі мен тазалығына, абаттандырылуына елеулі үлес қосқысы келетін әрбір семейлік үшін ендігі арада жаңа мүмкіндіктер туып отыр. Атап айтсақ, Шығыс Қазақстан облыстық жастардың «Жастар салауатты өмір үшін» қоғамдық бірлестігінің өкілдері іргелі іске бастамашы болды. Бұл жайында қаламыздағы ақпараттық орталықта өткен баспасөз мәслихатында мәлім етілді.
Қазіргі күні әрбір шаһар тұрғыны өз көшесіндегі немесе қала ішіндегі орын алған келеңсіздікке куә бола қалса, қандай тиісті шараға көшу керектігі жайында біле бермеуі мүмкін. Мәселен, су шайған асфальт, беті ашық қалған, жүргіншілерге қауіп туғызатын құдық сынды жайттар туралы құзырлы мекемелерге хабарлауда түрлі кедергілерге жолығып жатады. Ал семейлік жастар осынау олқылықтың орнын толтыруды көздепті. Жуырда бастамашыл топ жаңа жоба аясында дүниеге келген qeohund.kz атты жаңа электронды порталдың тұсауын кесті. Яғни, енді әрбір семейлік өзі куә болған келеңсіз көріністі суретке түсіріп немесе бейнежазба түрінде аталмыш сайтқа сала алады. Ол үшін порталға тіркеліп, тиісті нұсқаулықтарды орындаса жетіп жатыр. Ал сайтқа тіркелген жайтты әкімші заңгер арнайы сараптан өткізген соң құзырлы мекемеге сұрау салады. Осылайша, көшенің немесе тұтас мөлтек ауданның мәселесін шешуге мүмкіндік бар. Креативті идея авторларының айтуынша, аталмыш сайттың ашылғанына 8 ай уақыт өткен екен. Осынау аралықта порталға 67 бейнетүсірілім тіркеліп, ол турасында тиісті мекемелерге ұсынысхат жіберіліп, жартысынан көбі шешімін тауыпты.
Кеңірек тоқтала кетсек, аталмыш сайттың функциялық ауқымы кең. Мәселен, тіркелген бейнежазба немесе оқырман қалдырған мәтіндік хабарлама туралы форумдық талқылау жасауға, пікір қалдыруға болады. Бір есептен алғанда, аталмыш жоба әлеуметтік желінің де рөлін атқара алады.
Жаңа сайт тұсаукесерінде пікір білдірген қала әкімінің орынбасары Надежда Шарова бұл жобаның берер мүмкіндігі көп екендігін алға тартты.
— Бұл жүзеге асып отырған «qeohund.kz» интернет-ресурсы — қаламыздағы кейбір мәселелерді бірлесіп шешуде таптырмас жоба. Осы арқылы шаһар тұрғындары өз азаматтық ұстанымдарын қалыптастырып, қала өмірінің, қазіргі қалыптасқан қоғамдық қатынастардың салауатты негізде өріс алуына ықпал ете алады,- деді Н.Васильевна.
Тың жобаның қолдаушысы «Сорос-Қазақстан» қоры болып табылады. Мақсат әуел баста көзделгендей – айқын. Қазіргі күні бастамашыл топ мүшелері межеге қол жеткізді. Жалпы, Интернетке кіруге мүмкіндігіңіз болса, кез келген жерден-ақ сайтқа тіркелуге арналған қарапайым рәсімнен өтіп, электронды порталдың белсенді қолданушысына айналуыңызға болады. Ал өз аулаңыздағы немесе көшеңіздегі фотосуретке түсіріп алған көріністі «Мәселені қосқым келеді» сілтемесін басу арқылы тіркей аласыз. Қазіргі күннің өзінде аталмыш сайтта қаламыздың әр көшесінен түсірілген суреттер тұр. Басым көпшілігі ой-шұқыры көп қала шетіндегі жолдар екен. Сондай-ақ қоқыс басқан аулалар туралы да қалдырылған жазбалар бар.
Идея жетекшілерінің бірі Ерсін Құдияров әрбір семейлік жасқа аталмыш сайтқа тіркеліп, қаламыздың көрікті де талапқа сай болуы үшін азаматтық белсенділік көрсетіп, жергілікті өзін-өзі басқару ісіне араласуға, үлес қосуға шақырды. Сонымен қатар сайттың fasebook, vk.com, instagram әлеуметтік желілерінде де арнайы парақшалары ашылған.
Қорыта айтқанда, қаламыздағы әлеуметтік мәселелердің шешім табуы жолында тағы бір тың қадам жасалды.
Қуаныш ЖОЛЫМБЕТ, «Семей таңы»
