Шығыс Қазақстан облысы аумағында кәсіпкерлерге беріліп, кейіннен пайдаланылмаған 984,3 мың гектар жер анықталып, оның бүгінге дейін 527,8 мың гектары мемлекет меншігіне қайтарылды. Ал қалған 453,8 мың гектар жерді иеленіп отырған кәсіпкерлер жерді тиісті мақсатта қолдануға кіріскен.
Сондай-ақ мемлекет меншігіне қайтарылып алынған аумақтың 81% бөлігі қайта ауыл шаруашылығы мақсатында пайдаланылып келеді. Қазіргі таңда құзырлы органның қатаң қадағалауына суармалы алқаптар да алынған.
— Үлкен аумақты суармалы алқаптар ұзақ мерзімге жалға беріліп, артынан игерілмей жатады. Сондықтан облыс әкімі Даниал Ахметовтің тапсырмасы бойынша, игерілмей жатқан жерлер анықталды және мемлекетке қайтарылып алынып, игеремін деген кәсіпкерлерге берілуде,– дейді ШҚО Жер қатынастары басқармасы басшысының міндетін атқарушы Ернар Бексұлтанов.
Айта кету керек, осы күнге дейін Үржар ауданында 4,6 мың, Зайсан ауданында 1,2 мың, Тарбағатай ауданында 1,0 мың гектар жер мемлекеттің меншігіне қайтарылды. Аталған аумақтар инвестициялық жобаларды іске асыру мақсатында өзге жер иеленушілерге берілетін болады. Соның ішінде Үржар ауданындағы жерге құс фабрикасының құрылысы жоспарлануда.
ШҚО Ақпараттық орталығы.
